Genesis 47
The Book of Genesis
܀ ܒܪܝܬܐ ܡܙ ܀
1 ܘܶܐܬܳܐ ܝܰܘܣܶܦ ܘܚܰܘܺܝ ܠܦܶܪܥܽܘܢ: ܘܶܐܡܰܪ ܠܶܗ: ܐܳܒܝ ܘܰܐܚܰܝ̈: ܘܥܳܢ̈ܗܽܘܢ ܘܬܰܘܖ̈ܰܝܗܽܘܢ: ܘܟܽܠ ܕܺܐܝܬ ܠܗܽܘܢ: ܐܶܬܰܘ ܡܶܢ ܐܰܪܥܳܐ ܕܰܟܢܰܥܢ: ܘܗܳܐ ܫܪܶܝܢ ܒܰܐܪܥܳܐ ܕܓܶܫܳܢ.
2 ܘܡܶܢ ܐܰܚܰܘ̈ܗܝ ܕܒܰܪ ܚܰܡܫܳܐ ܓܰܒܖ̈ܺܝܢ: ܘܰܐܩܺܝܡ ܐܶܢܽܘܢ ܩܕܳܡ ܦܶܪܥܽܘܢ.
3 ܘܶܐܡܰܪ ܦܶܪܥܽܘܢ ܠܰܐܚܰܘ̈ܗܝ ܕܝܰܘܣܶܦ: ܡܳܢܰܘ ܥܒܳܕܟܽܘܢ: ܘܶܐܡܰܪܘ ܠܦܶܪܥܽܘܢ: ܖ̈ܳܥܝܰܝ ܥܳܢ̈ܳܐ ܐܶܢܽܘܢ ܥܰܒܕܰܝ̈ܟ: ܐܳܦ ܚܢܰܢ: ܐܳܦ ܐܰܒܳܗܰܝ̈ܢ: ܡܶܢ ܛܰܠܝܽܘܬܰܢ.
4 ܘܶܐܡܰܪܘ ܠܦܶܪܥܽܘܢ: ܠܡܶܥܡܰܪ ܒܰܐܪܥܳܐ ܐܶܬܰܝܢ: ܡܶܛܽܠ ܕܠܰܝܬ ܪܶܥܝܳܐ ܠܥܳܢ̈ܳܐ ܕܥܰܒܕܰܝ̈ܟ: ܡܶܛܽܠ ܕܰܥܫܶܢ ܟܰܦܢܳܐ ܒܰܐܪܥܳܐ ܕܰܟܢܰܥܢ: ܘܗܳܫܳܐ ܢܶܬܒܽܘܢ ܥܰܒܕܰܝ̈ܟ ܒܰܐܪܥܳܐ ܕܓܶܫܳܢ.
5 ܘܶܐܡܰܪ ܦܶܪܥܽܘܢ ܠܝܰܘܣܶܦ: ܐܰܒܽܘܟ ܘܰܐܚܰܝ̈ܟ ܐܶܬܰܘ ܠܘܳܬܳܟ.
6 ܘܰܐܪܥܳܐ ܕܡܶܨܪܶܝܢ ܩܕܳܡܰܝܟ ܗܺܝ: ܒܫܽܘܦܪܳܗ̇ ܕܰܐܪܥܳܐ ܐܰܘܬܶܒ ܠܰܐܒܽܘܟ ܘܠܰܐܚܰܝ̈ܟ: ܢܶܬܒܽܘܢ ܒܰܐܪܥܳܐ ܕܓܶܫܳܢ. ܘܶܐܢ ܝܳܕܰܥ ܐܰܢ̱ܬ ܕܺܐܝܬ ܒܗܽܘܢ ܓܰܒܖ̈ܶܐ ܡܳܖ̈ܰܝ ܚܰܝܠܳܐ: ܥܒܶܕ ܐܶܢܽܘܢ ܡܳܖ̈ܰܝ ܩܶܢܝܳܢܳܐ ܥܰܠ ܟܽܠ ܕܺܐܝܬ ܠܺܝ.
7 ܘܰܐܥܶܠ ܝܰܘܣܶܦ ܠܝܰܥܩܽܘܒ ܐܰܒܽܘܗܝ: ܘܰܐܩܺܝܡܶܗ ܩܕܳܡ ܦܶܪܥܽܘܢ: ܘܒܰܪܶܟ ܝܰܥܩܽܘܒ ܠܦܶܪܥܽܘܢ.
8 ܘܶܐܡܰܪ ܦܶܪܥܽܘܢ ܠܝܰܥܩܽܘܒ: ܟܡܳܐ ܐܶܢܽܘܢ ܝܰܘ̈ܡܰܝ ܫ̈ܢܰܝ ܚܰܝܰܝ̈ܟ.
9 ܘܶܐܡܰܪ ܝܰܥܩܽܘܒ ܠܦܶܪܥܽܘܢ: ܝܰܘ̈ܡܰܝ ܫ̈ܢܰܝ ܬܰܘܬܳܒܽܘܬܝ: ܡܳܐܐ ܘܰܬܠܳܬܺܝܢ ܫܢܺܝ̈ܢ: ܙܥܽܘܪܺܝܢ ܗܘܰܘ ܘܒܺܝ̈ܫܺܝܢ ܫ̈ܢܰܝ ܚܰܝܰܝ̈: ܘܠܳܐ ܡܰܛܺܝܘ ܠܰܫܢܰܝ̈ ܚܰܝܰܝ̈ ܐܰܒܗܰܝ̈ ܒܝܰܘ̈ܡܰܝ ܒܶܝܬ ܡܰܥܡܰܪܗܽܘܢ.
10 ܘܒܰܪܶܟ ܝܰܥܩܽܘܒ ܠܦܶܪܥܽܘܢ: ܘܰܢܦܰܩ ܝܰܥܩܽܘܒ ܡܶܢ ܩܕܳܡ ܦܶܪܥܽܘܢ.
11 ܘܰܐܘܬܶܒ ܝܰܘܣܶܦ ܠܰܐܒܽܘܗܝ ܘܠܰܐܚܰܘ̈ܗܝ: ܘܝܰܗܒ ܠܗܽܘܢ ܝܳܪܬܽܘܬܳܐ ܒܰܐܪܥܳܐ ܕܡܶܨܪܶܝܢ: ܒܫܽܘܦܪܳܗ̇ ܕܰܐܪܥܳܐ ܕܪܰܥܡܣܺܝܣ: ܐܰܝܟ ܕܦܰܩܶܕ ܦܶܪܥܽܘܢ.
12 ܘܬܰܪܣܺܝ ܝܰܘܣܶܦ ܠܰܐܒܽܘܗܝ: ܘܠܰܐܚܰܘ̈ܗܝ: ܘܰܠܟܽܠܶܗ ܒܶܝܬ ܐܰܒܽܘܗܝ ܒܰܥܒܽܘܪܳܐ ܠܦܽܘܬ ܝܺܩܰܪܬܳܐ.
13 ܘܰܥܒܽܘܪܳܐ ܠܰܝܬ ܒܟܽܠܳܗ̇ ܐܰܪܥܳܐ: ܡܶܛܽܠ ܕܰܥܫܶܢ ܟܰܦܢܳܐ ܛܳܒ: ܘܚܶܪܒܰܬ ܟܽܠܳܗ̇ ܐܰܪܥܳܐ ܕܡܶܨܪܶܝܢ: ܘܰܐܪܥܳܐ ܕܰܟܢܰܥܢ ܡܶܢ ܩܕܳܡ ܟܰܦܢܳܐ.
14 ܘܠܰܩܶܛ ܝܰܘܣܶܦ ܟܽܠܶܗ ܟܶܣܦܳܐ ܕܶܐܫܬܟܰܚ ܒܰܐܪܥܳܐ ܕܡܶܨܪܶܝܢ: ܘܒܰܐܪܥܳܐ ܕܰܟܢܰܥܢ: ܒܰܥܒܽܘܪܳܐ ܕܙܳܒܢܺܝܢ ܗܘܰܘ: ܘܰܐܥܶܠ ܝܰܘܣܶܦ ܟܶܣܦܳܐ ܠܒܶܝܬ ܦܶܪܥܽܘܢ.
15 ܘܟܶܣܦܳܐ ܓܡܰܪ ܡܶܢ ܐܰܪܥܳܐ ܕܡܶܨܪܶܝܢ ܘܡܶܢ ܐܰܪܥܳܐ ܕܰܟܢܰܥܢ: ܘܶܐܬܰܘ ܟܽܠܗܽܘܢ ܡܶܨܖ̈ܳܝܶܐ ܠܘܳܬ ܝܰܘܣܶܦ: ܘܳܐܡܪܺܝܢ ܠܶܗ: ܗܰܒ ܠܰܢ ܥܒܽܘܪܳܐ: ܕܢܺܚܶܐ ܘܠܳܐ ܢܡܽܘܬ ܩܕܳܡܰܝܟ: ܡܶܛܽܠ ܕܰܓܡܰܪ ܠܶܗ ܟܶܣܦܳܐ.
16 ܐܶܡܰܪ ܠܗܽܘܢ ܝܰܘܣܶܦ: ܗܰܒܘ ܠܺܝ ܩܶܢܝܳܢܟܽܘܢ: ܘܶܐܬܶܠ ܠܟܽܘܢ ܒܩܶܢܝܳܢܟܽܘܢ ܐܶܢ ܓܡܰܪ ܟܶܣܦܳܐ.
17 ܘܰܐܝܬܺܝܘ ܠܶܗ ܩܶܢܝܳܢܰܝ̈ܗܽܘܢ: ܘܝܰܗܒ ܠܗܽܘܢ ܝܰܘܣܶܦ ܥܒܽܘܪܳܐ ܒܖ̈ܰܟܫܳܐ: ܘܰܒܩܶܢܝܳܢܳܐ ܕܥܳܢ̈ܳܐ: ܕܬܰܘܖ̈ܶܐ ܘܰܕܚܶܡܖ̈ܳܐ: ܘܬܰܪܣܺܝ ܐܶܢܽܘܢ ܒܠܰܚܡܳܐ ܒܗܳܝ ܫܰܢ̱ܬܳܐ ܒܟܽܠܶܗ ܩܶܢܝܳܢܗܽܘܢ.
18 ܘܫܶܠܡܰܬ ܫܰܢ̱ܬܳܐ ܗܳܝ: ܘܶܐܬܰܘ ܠܘܳܬܶܗ ܒܫܰܢ̱ܬܳܐ ܐ̱ܚܪܺܬܳܐ: ܘܶܐܡܰܪܘ ܠܶܗ: ܠܳܐ ܡܛܰܫܶܝܢܰܢ ܡܶܢ ܡܳܪܰܢ: ܡܶܛܽܠ ܕܰܓܡܰܪ ܟܶܣܦܳܐ ܟܽܠܶܗ ܘܩܶܢܝܳܢܳܐ ܕܰܒܥܺܝܪܳܐ ܠܘܳܬ ܡܳܪܰܢ: ܘܠܳܐ ܐܶܫܬܚܰܪ ܩܕܳܡ ܡܳܪܰܢ: ܐܶܠܳܐ ܐܶܢ ܢܰܦ̈ܫܳܬܰܢ ܘܰܐܖ̈ܥܳܬܰܢ.
19 ܠܡܳܢܳܐ ܡܳܝܬܶܝܢܰܢ ܩܕܳܡܰܝܟ: ܐܳܦ ܚܢܰܢ ܐܳܦ ܐܰܖ̈ܥܳܬܰܢ: ܙܒܶܢ ܠܰܢ ܘܠܰܐܖ̈ܥܳܬܰܢ ܒܠܰܚܡܳܐ: ܘܢܶܗܘܶܐ ܚܢܰܢ ܘܰܐܖ̈ܥܳܬܰܢ ܥܰܒ̈ܕܶܐ ܠܦܶܪܥܽܘܢ: ܘܗܰܒ ܠܰܢ ܙܰܪܥܳܐ: ܘܢܺܚܶܐ ܘܠܳܐ ܢܡܽܘܬ: ܘܰܐܪܥܳܐ ܠܳܐ ܬܶܚܪܰܒ.
20 ܘܰܙܒܰܢ ܝܰܘܣܶܦ ܟܽܠܳܗ̇ ܐܰܪܥܳܐ ܕܡܶܨܪܶܝܢ ܠܦܶܪܥܽܘܢ: ܡܶܛܽܠ ܕܙܰܒܶܢܘ ܡܶܨܖ̈ܳܝܶܐ ܓܒܰܪ ܚܰܩܠܶܗ: ܡܶܛܽܠ ܕܰܥܫܶܢ ܥܠܰܝܗܽܘܢ ܟܰܦܢܳܐ: ܘܰܗܘܳܬ ܐܰܪܥܳܐ ܕܦܶܪܥܽܘܢ.
21 ܘܰܠܥܰܡܳܐ ܫܰܢܺܝ ܐܶܢܽܘܢ ܡܶܢ ܩܪܶܐ ܠܰܩܪܶܐ: ܡܶܢ ܣܽܘܦ ܬܚܽܘܡܶܝ̈ܗ̇ ܕܡܶܨܪܶܝܢ ܘܰܥܕܰܡܳܐ ܠܣܰܘܦܳܗ̇.
22 ܒܰܠܚܽܘܕ ܐܰܪܥܳܐ ܕܟܽܘܡܖ̈ܶܐ ܕܠܳܐ ܙܒܰܢ: ܡܶܛܽܠ ܕܰܩܝܳܡܬܳܐ ܩܳܝܡܳܐ ܗܘܳܬ ܠܟܽܘܡܖ̈ܶܐ ܡܶܢ ܠܘܳܬ ܦܶܪܥܽܘܢ: ܘܳܐܟܠܺܝܢ ܗܘܰܘ ܩܝ̈ܳܡܳܬܗܽܘܢ: ܕܝܳܗܶܒ ܗܘܳܐ ܠܗܽܘܢ ܦܶܪܥܽܘܢ: ܡܶܛܽܠ ܗܳܢܳܐ ܠܳܐ ܙܰܒܶܢܘ ܐܰܪܥܗܽܘܢ.
23 ܘܶܐܡܰܪ ܝܰܘܣܶܦ ܠܥܰܡܳܐ: ܗܳܐ ܙܒܰܢܬܟܽܘܢ ܝܰܘܡܳܢܳܐ ܠܟܽܘܢ ܘܠܰܐܖ̈ܥܳܬܟܽܘܢ ܠܦܶܪܥܽܘܢ: ܗܳܐ ܠܟܽܘܢ ܙܰܪܥܳܐ ܕܬܶܙܪܥܽܘܢ ܒܰܐܪܥܳܐ.
24 ܘܡܳܐ ܕܥܳܐܠܳܐ ܥܠܰܠܬܳܐ: ܗܘܰܝܬܽܘܢ ܝܳܗܒܺܝܢ ܚܰܕ ܡܶܢ ܚܰܡܫܳܐ ܠܦܶܪܥܽܘܢ: ܘܰܐܪܒܰܥ ܡܢ̈ܰܘܳܢ ܢܶܗܘ̈ܝܳܢ ܠܟܽܘܢ ܠܙܰܪܥܳܐ ܘܰܠܚܰܩܠܳܐ: ܘܰܠܡܶܐܟܽܘܠܬܟܽܘܢ ܘܰܠܡܶܐܟܽܘܠܬܳܐ ܕܒܳܬܰܝ̈ܟܽܘܢ: ܘܰܠܡܶܐܟܽܘܠܬܳܐ ܕܺܝܩܰܪܬܟܽܘܢ.
25 ܘܶܐܡܰܪܘ ܐܰܚܺܝܬܳܢ: ܢܶܫܟܰܚ ܖ̈ܰܚܡܶܐ ܒܥܰܝ̈ܢܰܝ ܡܳܪܰܢ: ܘܢܶܗܘܶܐ ܥܰܒ̈ܕܶܐ ܠܦܶܪܥܽܘܢ.
26 ܘܣܳܡܶܗ ܝܰܘܣܶܦ ܢܳܡܽܘܣܳܐ ܥܕܰܡܳܐ ܠܝܰܘܡܳܢܳܐ ܥܰܠ ܐܰܪܥܳܐ ܕܡܶܨܪܶܝܢ: ܠܦܶܪܥܽܘܢ ܚܰܕ ܡܶܢ ܚܰܡܫܳܐ: ܒܰܠܚܽܘܕ ܐܰܪܥܳܐ ܕܟܽܘܡܖ̈ܶܐ ܕܠܳܐ ܗܘܳܬ ܕܦܶܪܥܽܘܢ.
27 ܘܺܝܬܶܒ ܝܺܣܪܳܐܶܝܠ ܒܰܐܪܥܳܐ ܕܡܶܨܪܶܝܢ ܘܒܰܐܪܥܳܐ ܕܓܶܫܳܢ: ܘܰܥܫܶܢܘ ܒܳܗ̇: ܘܰܟܒܰܪܘ ܘܰܣܓܺܝܘ ܛܳܒ.
28 ܘܰܚܝܳܐ ܝܰܥܩܽܘܒ ܒܰܐܪܥܳܐ ܕܡܶܨܪܶܝܢ ܫܒܰܥܶܣܖ̈ܶܐ ܫܢܺܝ̈ܢ: ܘܰܗܘܰܘ ܝܰܘܡܰܘ̈ܗܝ ܕܝܰܥܩܽܘܒ ܫܢܰܝ̈ ܚܰܝܰܘ̈ܗܝ: ܡܳܐܐ ܘܰܐܪܒܥܺܝܢ ܘܰܫܒܰܥ ܫܢܺܝ̈ܢ.
29 ܘܰܩܪܶܒܘ ܝܰܘܡܰܘ̈ܗܝ ܕܺܝܣܪܳܐܶܝܠ ܠܰܡܡܳܬ: ܘܰܩܪܳܐ ܠܝܰܘܣܶܦ ܒܪܶܗ ܘܶܐܡܰܪ ܠܶܗ: ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ: ܣܺܝܡ ܐܺܝܕܳܟ ܬܚܶܝܬ ܚܰܨܝ: ܘܰܐܘܡܶܝܟ ܒܡܳܪܝܳܐ: ܘܰܥܒܶܕ ܥܰܡܝ ܛܰܝܒܽܘܬܳܐ ܘܩܽܘܫܬܳܐ: ܘܠܳܐ ܬܶܩܒܪܰܢܝ ܒܡܶܨܪܶܝܢ.
30 ܘܶܐܫܟܰܒ ܥܰܡ ܐܰܒ̈ܳܗܰܝ: ܘܰܫܩܽܘܠܰܝܢܝ ܡܶܢ ܡܶܨܪܶܝܢ ܘܰܩܒܽܘܪܰܝܢܝ ܒܩܰܒܪܗܽܘܢ: ܘܶܐܡܰܪ ܝܰܘܣܶܦ: ܐܶܢܳܐ ܐܶܥܒܶܕ ܐܰܝܟ ܡܶܠܬܳܟ.
31 ܘܶܐܡܰܪ ܝܺܡܰܝ ܠܺܝ: ܘܺܝܡܳܐ ܠܶܗ: ܘܰܣܓܶܕ ܝܺܣܪܳܐܶܝܠ ܥܰܠ ܪܺܝܫ ܚܽܘܛܪܶܗ.