Genesis 1
The Book of Genesis
܀ ܒܪܝܬܐ ܐ ܀
1 ܒܪܺܝܫܺܝܬ ܒܪܳܐ ܐܰܠܳܗܳܐ ܝܳܬ ܫܡܰܝܳܐ ܘܝܳܬ ܐܰܪܥܳܐ.
2 ܘܰܐܪܥܳܐ ܗܘܳܬ ܬܽܘܗ ܘܒܽܘܗ. ܘܚܶܫܽܘܟܳܐ ܥܰܠ ܐܰܦܰܝ̈ ܬܽܗܘܡܳܐ. ܘܪܽܘܚܶܗ ܕܰܐܠܳܗܳܐ ܡܪܰܚܦܳܐ ܥܰܠ ܐܰܦܰܝ̈ ܡܰܝ̈ܳܐ.
3 ܘܶܐܡܰܪ ܐܰܠܳܗܳܐ: ܢܶܗܘܶܐ ܢܽܘܗܪܳܐ: ܘܰܗܘܳܐ ܢܽܘܗܪܳܐ.
4 ܘܰܚܙܳܐ ܐܰܠܳܗܳܐ ܠܢܽܘܗܪܳܐ ܕܫܰܦܺܝܪ: ܘܰܦ̣ܪܰܫ ܐܰܠܳܗܳܐ ܒܶܝܬ ܢܽܘܗܪܳܐ ܠܚܶܫܽܘܟܳܐ.
5 ܘܰܩܪܳܐ ܐܰܠܳܗܳܐ ܠܢܽܘܗܪܳܐ ܐܺܝܡܳܡܳܐ: ܘܰܠܚܶܫܽܘܟܳܐ ܩܪܳܐ ܠܺܠܝܳܐ: ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܚܰܕ.
6 ܘܶܐܡܰܪ ܐܰܠܳܗܳܐ ܢܶܗܘܶܐ ܪܩܺܝܥܳܐ ܒܡܶܨܥܰܬ ܡܰܝ̈ܳܐ: ܘܢܶܗܘܶܐ ܦܳܪܶܫ ܒܶܝܬ ܡܰܝ̈ܳܐ ܠܡܰܝ̈ܳܐ.
7 ܘܰܥ̣ܒܰܕ ܐܰܠܳܗܳܐ ܪܩܺܝܥܳܐ: ܘܰܦ̣ܪܰܫ ܒܶܝܬ ܡܰܝ̈ܳܐ ܕܰܠܬܰܚܬ ܡܶܢ ܪܩܺܝܥܳܐ: ܘܒܶܝܬ ܡܰܝ̈ܳܐ ܕܰܠܥܶܠ ܡܶܢ ܪܩܺܝܥܳܐ: ܘܰܗܘܳܐ ܗܳܟܰܢܳܐ.
8 ܘܰܩܪܳܐ ܐܰܠܳܗܳܐ ܠܰܪܩܺܝܥܳܐ ܫܡܰܝܳܐ: ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܕܰܬܪܶܝܢ.
9 ܘܶܐܡܰܪ ܐܰܠܳܗܳܐ: ܢܶܬܟܰܢܫܽܘܢ ܡܰܝ̈ܳܐ ܕܰܠܬܰܚܬ ܡܶܢ ܫܡܰܝܳܐ ܠܰܐܬܪܳܐ ܚܰܕ: ܘܬܶܬܚܙܶܐ ܝܰܒܺܝܫܬܳܐ: ܘܰܗܘܳܐ ܗܳܟܰܢܳܐ.
10 ܘܰܩܪܳܐ ܐܰܠܳܗܳܐ ܠܝܰܒܺܝܫܬܳܐ ܐܰܪܥܳܐ: ܘܰܠܟܶܢܫܳܐ ܕܡܰܝ̈ܳܐ ܩܪܳܐ ܝܰܡ̈ܡܶܐ: ܘܰܚܙܳܐ ܐܰܠܳܗܳܐ ܕܫܰܦܺܝܪ.
11 ܘܶܐܡܰܪ ܐܰܠܳܗܳܐ: ܬܰܦܶܩ ܐܰܪܥܳܐ ܬܰܕܐܳܐ ܥܶܣܒܳܐ ܕܡܶܙܕܪܰܥ ܙܰܪܥܳܐ ܠܓܶܢܣܶܗ: ܘܺܐܝܠܳܢܳܐ ܕܦܺܐܖ̈ܶܐ ܠܓܶܢܣܶܗ: ܕܢܶܨܒܬܶܗ ܒܶܗ ܥܰܠ ܐܰܪܥܳܐ: ܘܰܗܘܳܐ ܗܳܟܰܢܳܐ.
12 ܘܰܐܦܩܰܬ ܐܰܪܥܳܐ ܬܰܕܐܳܐ ܥܶܣܒܳܐ ܕܡܶܙܕܪܰܥ ܙܰܪܥܳܐ ܠܓܶܢܣܶܗ: ܘܺܐܝܠܳܢܳܐ ܕܥܳܒܶܕ ܦܺܐܖ̈ܶܐ ܕܢܶܨܒܬܶܗ ܒܶܗ ܠܓܶܢܣܶܗ: ܘܰܚܙܳܐ ܐܰܠܳܗܳܐ ܕܫܰܦܺܝܪ.
13 ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܕܰܬܠܳܬܳܐ.
14 ܘܶܐܡܰܪ ܐܰܠܳܗܳܐ: ܢܶܗܘܽܘܢ ܢܰܗܺܝܖ̈ܶܐ ܒܰܪܩܺܝܥܳܐ ܕܰܫܡܰܝܳܐ: ܠܡܶܦܪܰܫ ܒܶܝܬ ܐܺܝܡܳܡܳܐ ܠܠܺܠܝܳܐ: ܘܢܶܗܘܽܘܢ ܠܳܐܬܘ̈ܳܬܳܐ: ܘܰܠܙܰܒܢ̈ܶܐ: ܘܰܠܝܰܘ̈ܡܳܬܳܐ: ܘܠܰܫܢܰܝ̈ܳܐ.
15 ܘܢܶܗܘܽܘܢ ܡܰܢܗܪܺܝܢ ܒܰܪܩܺܝܥܳܐ ܕܰܫܡܰܝܳܐ ܠܡܰܢܗܳܪܽܘ ܥܰܠ ܐܰܪܥܳܐ: ܘܰܗܘܳܐ ܗܳܟܰܢܳܐ.
16 ܘܰܥ̣ܒܰܕ ܐܰܠܳܗܳܐ ܬܪܶܝܢ ܢܰܗܺܝܖ̈ܶܐ ܪܰܘܖ̈ܒܶܐ: ܢܰܗܺܝܪܳܐ ܪܰܒܳܐ ܠܫܽܘܠܛܳܢܳܐ ܕܺܐܝܡܳܡܳܐ: ܘܢܰܗܺܝܪܳܐ ܙܥܽܘܪܳܐ ܠܫܽܘܠܛܳܢܳܐ ܕܠܺܠܝܳܐ: ܘܟܰܘܟ̈ܒܶܐ.
17 ܘܝܰܗܒ ܐܶܢܽܘܢ ܐܰܠܳܗܳܐ ܒܰܪܩܺܝܥܳܐ ܕܰܫܡܰܝܳܐ ܠܡܰܢܗܳܪܽܘ ܥܰܠ ܐܰܪܥܳܐ.
18 ܘܰܠܡܶܫܠܰܛ ܒܺܐܝܡܳܡܳܐ ܘܰܒܠܺܠܝܳܐ: ܘܰܠܡܶܦܪܰܫ ܒܶܝܬ ܢܽܘܗܪܳܐ ܘܚܶܫܽܘܟܳܐ: ܘܰܚܙܳܐ ܐܰܠܳܗܳܐ ܕܫܰܦܺܝܪ.
19 ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܕܰܐܪܒܥܳܐ.
20 ܘܶܐܡܰܪ ܐܰܠܳܗܳܐ: ܢܰܪܚܫܽܘܢ ܡܰܝ̈ܳܐ ܪܰܚܫܳܐ ܢܰܦܫܳܐ ܚܰܝܬܳܐ: ܘܦܳܪܰܚܬܳܐ ܬܶܦܪܰܚ ܥܰܠ ܐܰܪܥܳܐ ܥܰܠ ܐܰܦܰܝ̈ ܪܩܺܝܥܳܐ ܕܰܫܡܰܝܳܐ.
21 ܘܰܒܪܳܐ ܐܰܠܳܗܳܐ ܬܰܢܺܝ̈ܢܶܐ ܪܰܘܖ̈ܒܶܐ: ܘܟܽܠ ܢܰܦܫܳܐ ܚܰܝܬܳܐ ܕܪܰܚܫܳܐ ܕܰܐܪܚܶܫܘ ܡܰܝ̈ܳܐ ܠܓܶܢܣܗܽܘܢ: ܘܟܽܠ ܦܳܪܰܚܬܳܐ ܕܓܶܦܳܐ ܠܓܶܢܣܳܐ ܘܰܚܙܳܐ ܐܰܠܳܗܳܐ ܕܫܰܦܺܝܪ.
22 ܘܒܰܪܶܟ ܐܶܢܽܘܢ ܐܰܠܳܗܳܐ ܘܶܐܡܰܪ ܠܗܽܘܢ: ܦܪܰܘ ܘܰܣܓܰܘ: ܘܰܡܠܰܘ ܡܰܝ̈ܳܐ ܕܰܒܝܰܡ̈ܡܶܐ: ܘܦܳܪܰܚܬܳܐ ܬܶܣܓܶܐ ܒܰܐܪܥܳܐ.
23 ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܕܚܰܡܫܳܐ.
24 ܘܶܐܡܰܪ ܐܰܠܳܗܳܐ: ܬܰܦܶܩ ܐܰܪܥܳܐ ܢܰܦܫܳܐ ܚܰܝܬܳܐ ܠܓܶܢܣܳܗ̇: ܒܥܺܝܪܳܐ ܘܖ̈ܰܚܫܳܐ: ܘܚܰܝܽܘܬܳܐ ܕܰܐܪܥܳܐ ܠܓܶܢܣܳܗ̇: ܘܰܗܘܳܐ ܗܳܟܰܢܳܐ.
25 ܘܰܥܒܰܕ ܐܰܠܳܗܳܐ ܚܰܝܽܘܬܳܐ ܕܰܐܪܥܳܐ ܠܓܶܢܣܳܗ̇ ܘܰܒܥܺܝܪܳܐ ܠܓܶܢܣܳܗ̇: ܘܟܽܠܶܗ ܖ̈ܰܚܫܳܐ ܕܰܐܪܥܳܐ ܠܓܶܢܣܰܘ̈ܗܝ: ܘܰܚܙܳܐ ܐܰܠܳܗܳܐ ܕܫܰܦܺܝܪ.
26 ܘܶܐܡܰܪ ܐܰܠܳܗܳܐ: ܢܶܥܒܶܕ ܐ̱ܢܳܫܳܐ ܒܨܰܠܡܰܢ ܐܰܝܟ ܕܡܽܘܬܰܢ: ܘܢܶܫܠܛܽܘܢ ܒܢܽܘ̈ܢܰܝ ܝܰܡܳܐ: ܘܰܒܦܳܪܰܚܬܳܐ ܕܰܫܡܰܝܳܐ: ܘܒܰܒܥܺܝܪܳܐ: ܘܰܒܟܽܠܳܗ̇ ܚܰܝܽܘܬܳܐ ܕܰܐܪܥܳܐ: ܘܰܒܟܽܠܶܗ ܖ̈ܰܚܫܳܐ ܕܪܳܚܶܫ ܥܰܠ ܐܰܪܥܳܐ.
27 ܘܰܒܪܳܐ ܐܰܠܳܗܳܐ ܠܳܐܕܳܡ ܒܨܰܠܡܶܗ: ܒܰܨܠܶܡ ܐܰܠܳܗܳܐ ܒܪܳܝܗܝ: ܕܟܰܪ ܘܢܶܩܒܳܐ ܒܪܳܐ ܐܶܢܽܘܢ.
28 ܘܒܰܪܶܟ ܐܶܢܽܘܢ ܐܰܠܳܗܳܐ: ܘܶܐܡܰܪ ܠܗܽܘܢ ܐܰܠܳܗܳܐ: ܦܪܰܘ ܘܰܣܓܰܘ: ܘܰܡܠܰܘ ܐܰܪܥܳܐ ܘܟܽܘܒܫܽܘܗ̇. ܘܰܫܠܰܛܘ ܒܢܽܘ̈ܢܰܝ ܝܰܡܳܐ: ܘܰܒܦܳܪܰܚܬܳܐ ܕܰܫܡܰܝܳܐ: ܘܒܰܒܥܺܝܪܳܐ ܘܰܒܟܽܠܳܗ̇ ܚܰܝܽܘܬܳܐ ܕܪܳܚܫܳܐ ܥܰܠ ܐܰܪܥܳܐ.
29 ܘܶܐܡܰܪ ܐܰܠܳܗܳܐ: ܗܳܐ ܝܶܗܒܶܬ ܠܟܽܘܢ ܟܽܠܶܗ ܥܶܣܒܳܐ ܕܙܰܪܥܳܐ ܕܡܶܙܕܪܰܥ ܥܰܠ ܐܰܦܰܝ̈ ܟܽܠܳܗ̇ ܐܰܪܥܳܐ: ܘܟܽܠ ܐܺܝܠܳܢ ܕܺܐܝܬ ܒܶܗ ܦܺܐܖ̈ܰܝ ܐܺܝܠܳܢܶܗ ܕܙܰܪܥܶܗ ܡܶܙܕܪܰܥ: ܠܟܽܘܢ ܢܶܗܘܶܐ ܡܶܐܟܽܘܠܬܳܐ.
30 ܘܰܠܟܽܠܳܗ̇ ܚܰܝܽܘܬܳܐ ܕܕܰܒܪܳܐ: ܘܰܠܟܽܠܳܗ̇ ܦܳܪܰܚܬܳܐ ܕܰܫܡܰܝܳܐ: ܘܰܠܟܽܠ ܕܪܳܚܶܫ ܥܰܠ ܐܰܪܥܳܐ: ܕܺܐܝܬ ܒܶܗ ܢܰܦܫܳܐ ܚܰܝܬܳܐ: ܘܟܽܠܶܗ ܝܽܘܪܳܩܳܐ ܕܥܶܣܒܳܐ ܠܡܶܐܟܽܘܠܬܳܐ: ܘܰܗܘܳܐ ܗܳܟܰܢܳܐ.
31 ܘܰܚܙܳܐ ܐܰܠܳܗܳܐ ܟܽܠ ܕܰܥ̣ܒܰܕ: ܘܗܳܐ ܛܳܒ ܫܰܦܺܝܪ: ܘܰܗܘܳܐ ܪܰܡܫܳܐ ܘܰܗܘܳܐ ܨܰܦܪܳܐ ܝܰܘܡܳܐ ܕܶܫܬܳܐ.