2 Chronicles 34
The second Book of Chronicles
܀ ܒ ܕܘܒܪ ܝܘܡ̈ܬܐ ܠܕ ܀
1 ܒܰܪ ܬܡܳܢܶܐ ܫܢܺܝ̈ܢ ܝܽܘܫܺܝܳܐ ܟܰܕ ܩܳܡ ܒܡܰܠܟܽܘܬܳܐ. ܘܰܬܠܳܬܺܝܢ ܘܰܚܕܳܐ ܫܰܢ̱ܬܳܐ ܐܰܡܠܶܟ ܒܽܐܘܪܺܫܠܶܡ.
2 ܘܰܥܒܰܕ ܕܫܰܦܺܝܪ ܩܕܳܡ ܡܳܪܝܳܐ. ܘܗܰܠܶܟ ܒܽܐܘܖ̈ܚܳܬܶܗ ܕܕܰܘܺܝܕ ܐܰܒܽܘܗܝ ܘܠܳܐ ܣܛܳܐ ܡܶܢܗܶܝܢ ܠܳܐ ܠܝܰܡܺܝܢܳܐ ܘܠܳܐ ܠܣܶܡܳܠܳܐ.
3 ܘܒܰܬܡܳܢܶܐ ܫܢܺܝ̈ܢ ܠܡܰܠܟܽܘܬܶܗ. ܥܕܰܡܳܐ ܠܗܳܫܳܐ ܗܽܘ ܛܰܠܝܳܐ ܗܘܳܐ ܙܥܽܘܪܳܐ. ܘܫܰܪܺܝ ܗܘܳܐ ܠܰܡܨܰܠܳܝܽܘ ܠܰܐܠܳܗܶܗ ܕܕܰܘܺܝܕ ܐܰܒܽܘܗܝ ܘܒܰܫܢܰܬ ܬܰܪܬܰܥܶܣܖ̈ܶܐ ܫܢܺܝ̈ܢ. ܫܰܪܺܝ ܗܘܳܐ ܠܰܡܕܰܟܳܝܽܘ ܠܺܝܗܽܘܕܳܐ. ܘܰܠܥܳܡܽܘܖ̈ܶܝܗ̇ ܕܽܐܘܪܺܫܠܶܡ ܘܫܰܪܺܝ ܗܘܳܐ ܠܡܶܥܩܰܪ ܥܠܰܘ̈ܳܬܳܐ ܘܰܦܬܰܟܖ̈ܶܐ. ܘܢܶܡܖ̈ܶܐ ܘܚܽܘ̈ܓܒܶܐ.
4 ܘܥܶܩ̈ܶܐ. ܘܙܰܓ̈ܶܐ. ܘܟܽܠ ܐܺܝܠܳܢܺܝ̈ܢ ܕܥܳܒܕܺܝܢ ܗܘܰܘ ܠܰܦܬܰܟܖ̈ܶܐ. ܬܰܒܰܪ. ܘܰܐܕܶܩ. ܘܰܕܪܳܐ ܩܶܛܡܗܽܘܢ ܒܶܝܬ ܩܰܒܖ̈ܶܐ ܕܰܒܢܰܝ̈ ܐ̱ܢܳܫܳܐ. ܕܰܡܕܰܒܚܺܝܢ ܗܘܰܘ ܠܗܽܘܢ.
5 ܘܓܰܖ̈ܡܶܐ ܕܟܽܘܡܖ̈ܶܐ ܕܦܳܠܚܺܝܢ ܗܘܰܘ ܠܗܽܘܢ. ܚܰܛܘ ܐܶܢܽܘܢ ܡܶܢ ܩܰܒܖ̈ܰܝܗܽܘܢ. ܘܰܐܝܬܺܝܘ ܘܰܐܘܩܶܕܘ ܐܶܢܽܘܢ. ܘܕܰܟܺܝ ܠܺܝܗܽܘܕܳܐ ܘܠܽܐܘܪܺܫܠܶܡ.
6 ܘܰܠܩܽܘܖ̈ܝܳܐ ܕܒܶܝܬ ܡܢܰܫܶܐ ܘܒܶܝܬ ܐܰܦܪܶܝܡ. ܘܰܕܫܶܡܥܽܘܢ. ܘܰܕܢܰܦܬܳܠܺܝ. ܒܫܽܘܩܰܝ̈ܗܽܘܢ ܟܰܕ ܚܳܕܪܺܝܢ.
7 ܘܰܥܩܰܪ ܡܰܕܒ̈ܚܶܐ. ܘܬܰܒܰܪ ܨܰܠ̈ܡܶܐ. ܥܕܰܡܳܐ ܕܰܐܕܶܩ ܐܶܢܽܘܢ ܐܰܝܟ ܥܰܦܪܳܐ ܘܰܕܪܳܐ ܐܶܢܽܘܢ ܒܟܽܠܳܗ̇ ܐܰܪܥܳܐ ܕܺܝܣܪܳܐܶܝܠ ܘܰܗܦܰܟ ܘܶܐܬܳܐ ܠܽܐܘܪܺܫܠܶܡ.
8 ܘܒܰܫܢܰܬ ܬܡܳܢܰܥܶܣܖ̈ܶܐ ܫܢܺܝ̈ܢ ܠܡܰܠܟܽܘܬܶܗ. ܕܰܟܺܝ ܐܰܪܥܳܐ ܕܺܝܣܪܳܐܶܝܠ. ܘܒܰܝܬܶܗ. ܘܫܰܕܰܪ ܠܫܳܦܳܢ ܒܰܪ ܐܰܠܨܳܝܳܐ. ܘܠܰܡܥܰܣܝܳܐ ܣܳܦܪܳܐ ܕܰܩܪܺܝܬܳܐ. ܘܶܐܡܰܪ ܠܗܽܘܢ. ܙܶܠܘ ܘܰܒܕܽܘܩܘ ܒܰܝܬܶܗ ܕܡܳܪܝܳܐ ܐܰܠܳܗܟܽܘܢ.
9 ܘܶܐܬܰܘ ܠܘܳܬ ܚܶܠܰܩܝܳܐ ܟܳܗܢܳܐ ܪܰܒܳܐ. ܘܝܰܗܒܘ ܟܶܣܦܳܐ ܕܥܰܠ ܠܒܰܝܬܶܗ ܕܡܳܪܝܳܐ. ܕܟܰܢܶܫܘ ܠܶܘ̈ܳܝܶܐ ܢܳܛܖ̈ܰܝ ܬܰܖ̈ܥܶܐ. ܡܶܢ ܐܺܝܕܳܐ ܕܰܡܢܰܫܶܐ ܘܕܰܐܦܪܶܝܡ. ܘܡܶܢ ܐܺܝܕܳܐ ܕܟܽܠܶܗ ܝܺܣܪܳܐܶܝܠ. ܘܡܶܢ ܟܽܠܶܗ ܝܺܗܽܘܕܳܐ ܘܒܶܢܝܳܡܶܝܢ. ܘܡܢ ܟܽܠܗܽܘܢ ܥܳܡܽܘܖ̈ܶܝܗ̇ ܕܽܐܘܪܺܫܠܶܡ.
10 ܘܝܰܗܒܘ ܥܰܠ ܐܺܝܕܳܐ ܕܥܳܒܕܰܝ̈ ܥܒܺܝ̈ܕܳܬܳܐ. ܕܰܡܫܰܠܛܺܝܢ ܒܒܰܝܬܶܗ ܕܡܳܪܝܳܐ. ܘܝܳܗܒܺܝܢ ܟܶܣܦܳܐ ܠܥܳܒܕܰܝ̈ ܥܒܺܝ̈ܕܳܬܳܐ ܕܒܰܝܬܶܗ ܕܡܳܪܝܳܐ. ܠܰܒܕܳܩܳܐ ܘܠܰܛܪܳܝܳܐ ܕܒܰܝܬܳܐ.
11 ܘܝܳܗܒܺܝܢ ܠܢܰܓܳܖ̈ܶܐ ܘܰܠܒܰܢܳܝ̈ܶܐ ܘܰܠܙܳܒܢܰܝ̈ ܛܰܒ̈ܥܶܐ ܛܳܒ̈ܶܐ. ܘܩܰܝ̈ܣܶܐ ܠܰܒܕܳܩܳܐ ܘܰܠܛܪܳܝܳܐ ܕܒܰܝܬܳܐ. ܕܰܩܦܰܠܘ ܡܰܠ̈ܟܶܐ ܕܺܝܗܽܘܕܳܐ.
12 ܘܓܰܒܖ̈ܶܐ ܥܳܒܕܺܝܢ ܗܘܰܘ ܒܗܰܝܡܳܢܽܘܬܳܐ. ܒܰܥܒܺܝ̈ܕܳܬܳܐ ܕܡܰܩܕܫܳܐ. ܘܰܥܠܰܝܗܽܘܢ ܫܰܠܺܝܛܺܝܢ ܗܘܰܘ. ܢܳܚܳܬ ܘܥܽܘܒܰܕܝܳܐ ܒܢܰܝ̈ ܡܶܪܰܪܺܝ. ܘܰܙܟܰܪܝܳܐ ܘܫܳܠܽܘܡ ܒܢܰܝ̈ ܩܳܗܳܬ. ܘܰܡܫܰܒ̈ܚܳܢܶܐ ܘܠܶܘ̈ܳܝܶܐ ܐܰܝܠܶܝܢ ܕܰܡܫܰܒܚܺܝܢ ܗܘܰܘ ܒܡܳܐܢܰܝ̈ ܬܶܫܒ̈ܚܳܬܳܐ.
13 ܘܟܽܠ ܥܳܒܕܰܝ̈ ܥܒܺܝ̈ܕܳܬܳܐ ܠܰܥܒܺܝ̈ܕܳܬܳܐ. ܘܡܶܢ ܠܶܘ̈ܳܝܶܐ. ܣܳܦܖ̈ܶܐ ܘܪܰܘܖ̈ܒܳܢܶܐ ܘܬܰܖ̈ܳܥܶܐ.
14 ܘܟܰܕ ܡܰܦܩܺܝܢ ܗܘܰܘ ܟܶܣܦܳܐ ܕܥܳܐܶܠ ܠܒܰܝܬܶܗ ܕܡܳܪܝܳܐ. ܐܶܫܟܰܚ ܗܘܳܐ ܚܶܠܰܩܝܳܐ ܟܳܗܢܳܐ. ܣܶܦܪܳܐ ܕܽܐܘܪܳܝܬܳܐ ܕܡܳܪܝܳܐ. ܕܶܐܬܺܝܗܶܒ ܗܘܳܐ ܥܰܠ ܐܺܝܕܳܐ ܕܡܽܘܫܶܐ.
15 ܘܰܥܢܳܐ ܚܶܠܰܩܝܳܐ ܟܳܗܢܳܐ. ܘܶܐܡܰܪ ܠܫܳܦܳܢ ܣܳܦܪܳܐ. ܣܶܦܪܳܐ ܕܽܐܘܪܳܝܬܳܐ ܐܶܫܟܚܶܬ ܒܒܰܝܬܶܗ ܕܡܳܪܝܳܐ. ܘܝܰܗܒ ܚܶܠܰܩܝܳܐ ܣܶܦܪܳܐ ܠܫܳܦܳܢ.
16 ܘܶܐܡܰܪ ܫܳܦܳܢ ܣܳܦܪܳܐ ܠܡܰܠܟܳܐ. ܟܽܠ ܡܶܕܶܡ ܕܶܐܡܰܪ ܠܶܗ ܚܶܠܰܩܝܳܐ ܘܰܐܬܺܝܒܶܗ ܦܶܬܓܳܡܳܐ. ܘܶܐܡܰܪ ܠܶܗ. ܟܽܠܡܶܕܶܡ ܕܝܰܗܒܬ ܒܺܐܝܕܳܐ ܕܥܰܒܕܰܝ̈ܟ. ܗܶܢܽܘܢ ܥܳܒܕܺܝܢ.
17 ܘܡܰܦܩܺܝܢ ܟܶܣܦܳܐ ܠܰܒܕܳܩܳܐ ܕܒܰܝܬܳܐ ܕܡܳܪܝܳܐ. ܘܝܳܗܒܺܝܢ ܚܽܘܫܒܳܢܳܐ ܠܩܳܝܽܘ̈ܡܶܐ ܘܰܠܥܳܒܕܰܝ̈ ܥܒܺܝ̈ܕܳܬܳܐ.
18 ܘܚܰܘܺܝ ܫܳܦܳܢ ܣܳܦܪܳܐ ܠܡܰܠܟܳܐ. ܘܶܐܡܰܪ. ܣܶܦܪܳܐ ܝܰܗܒ ܠܺܝ ܚܶܠܰܩܝܳܐ ܟܳܗܢܳܐ. ܘܰܩܪܳܐ ܒܶܗ ܫܳܦܳܢ ܩܕܳܡ ܡܰܠܟܳܐ.
19 ܘܰܗܘܳܐ ܕܟܰܕ ܫܡܰܥ ܡܰܠܟܳܐ ܦܶܬܓܳܡܰܘ̈ܗܝ ܕܢܳܡܽܘܣܳܐ. ܣܰܕܶܩ ܢܰܚܬܰܘ̈ܗܝ.
20 ܘܰܦܩܰܕ ܡܰܠܟܳܐ ܠܚܶܠܰܩܝܳܐ. ܘܠܰܐܚܺܝܩܽܘܡ ܒܰܪ ܫܳܦܳܢ. ܘܠܰܥܒܰܟܽܘܪ ܒܰܪ ܡܺܝܟܳܐ. ܘܰܠܫܳܦܳܢ ܣܳܦܪܳܐ. ܘܠܳܐܣܳܝܳܐ ܪܰܒ ܒܰܝܬܶܗ ܕܡܰܠܟܳܐ. ܘܶܐܡܰܪ ܠܗܽܘܢ.
21 ܙܶܠܘ ܨܰܠܰܘ ܩܕܳܡ ܡܳܪܝܳܐ ܥܠܰܝ. ܘܥܰܠ ܥܰܡܳܐ ܕܺܝܣܪܳܐܶܝܠ. ܘܥܰܠ ܝܺܗܽܘܕܳܐ. ܥܰܠ ܦܶܬܓܳܡܰܘ̈ܗܝ ܕܣܶܦܪܳܐ ܗܳܢܳܐ ܕܶܐܫܬܟܰܚ ܡܶܛܽܠ ܕܣܰܓܺܝܐܳܐ ܗ̱ܝ ܚܶܡܬܶܗ ܕܡܳܪܝܳܐ. ܕܗܺܝ ܐܳܬܝܳܐ ܥܠܰܝܢ. ܥܰܠ ܕܠܳܐ ܫܡܰܥܘ ܐܰܒܳܗܰܝ̈ܢ ܦܶܬܓܳܡܰܘ̈ܗܝ ܕܡܳܪܝܳܐ. ܠܡܶܥܒܰܕ ܟܽܠܡܳܐ ܕܰܟܬܺܝܒ ܥܠܰܝܢ ܒܣܶܦܪܳܐ ܗܳܢܳܐ.
22 ܘܶܐܙܰܠ ܚܶܠܰܩܝܳܐ. ܘܗܳܠܶܝܢ ܟܽܠܗܽܘܢ ܕܫܰܕܰܪ ܡܰܠܟܳܐ ܠܘܳܬ ܚܽܘܠܕܺܝ ܢܒܺܝܬܳܐ ܐܰܢ̱ܬܰܬ ܫܳܠܽܘܡ ܒܰܪ ܬܰܩܘܳܐ. ܒܰܪ ܚܶܣܕܳܐ ܢܳܛܰܪ ܡܳܐܢ̈ܶܐ. ܘܗܺܝ ܝܳܬܒܳܐ ܗܘܳܬ ܒܓܰܘ ܐܽܘܪܺܫܠܶܡ. ܒܝܽܘܠܦܳܢܳܐ. ܘܡܰܠܶܠܘ ܥܰܡܳܗ̇ ܐܰܝܟ ܦܽܘܩܕܳܢܳܐ ܕܡܰܠܟܳܐ.
23 ܘܳܐܡܪܳܐ ܠܗܽܘܢ. ܗܳܟܰܢܳܐ ܐܳܡܰܪ ܡܳܪܶܐ ܡܳܖ̈ܰܘܳܬܳܐ ܕܺܝܣܪܳܐܶܝܠ. ܐܶܡܰܪܘ ܠܓܰܒܪܳܐ ܕܫܰܕܰܪܟܽܘܢ ܠܘܳܬܝ.
24 ܗܳܟܰܢܳܐ. ܐܳܡܰܪ ܡܳܪܝܳܐ. ܗܳܐ ܡܰܝܬܶܐ ܐ̱ܢܳܐ ܒܺܝܫܬܳܐ ܥܰܠ ܐܰܬܪܳܐ ܗܳܢܳܐ. ܘܥܰܠ ܥܳܡܽܘܖ̈ܰܘܗܝ. ܟܽܠܗܶܝܢ ܠܰܘ̈ܛܳܬܳܐ ܕܰܟܬܺܝ̈ܒܳܢ ܥܰܠ ܣܶܦܪܳܐ ܕܰܩܪܰܘ ܩܕܳܡ ܡܰܠܟܳܐ ܕܺܝܗܽܘܕܳܐ.
25 ܡܶܛܽܠ ܕܫܰܒܩܽܘܢܝ. ܘܰܕܚܶܠܘ ܠܰܐܠܳܗ̈ܶܐ ܐ̱ܚܖ̈ܳܢܶܐ. ܘܰܐܪܓܙܽܘܢܝ ܒܰܥܒܳܕ ܐܺܝܕܰܝ̈ܗܽܘܢ. ܘܬܺܐܬܶܐ ܚܶܡܬܝ ܥܰܠ ܐܰܬܪܳܐ ܗܳܢܳܐ. ܘܠܳܐ ܬܶܕܥܰܟ.
26 ܘܥܰܠ ܡܰܠܟܳܐ ܕܺܝܗܽܘܕܳܐ ܕܫܰܕܰܪܟܽܘܢ ܠܡܶܫܐܰܠ ܡܶܢ ܡܳܪܝܳܐ. ܗܳܟܰܢܳܐ ܬܺܐܡܪܽܘܢ ܠܶܗ. ܗܳܟܰܢܳܐ ܐܳܡܰܪ ܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܦܶܬܓܳܡ̈ܶܐ ܕܰܫܡܰܥܬ.
27 ܚܠܳܦ ܕܶܐܬܬܒܰܪ ܠܶܒܳܟ. ܘܙܳܥܬ ܡܶܢ ܩܕܳܡ ܡܳܪܝܳܐ. ܟܰܕ ܫܡܰܥܬ ܦܶܬܓܳܡ̈ܶܐ ܗܳܠܶܝܢ ܕܡܰܝܬܶܐ ܐ̱ܢܳܐ ܥܰܠ ܐܰܬܪܳܐ ܗܳܢܳܐ. ܘܥܰܠ ܥܳܡܽܘܖ̈ܰܘܗܝ. ܘܶܐܬܬܒܰܪܬ ܩܕܳܡܰܝ. ܘܣܰܕܶܩܬ ܢܰܚܬܰܝ̈ܟ. ܘܰܒܟܰܝܬ ܩܕܳܡܰܝ ܘܳܐܦ ܐܶܢܳܐ ܫܶܡܥܶܬ. ܐܳܡܰܪ ܡܳܪܝܳܐ.
28 ܡܶܛܽܠ ܗܳܢܳܐ ܩܳܦܶܣ ܐ̱ܢܳܐ ܠܳܟ ܠܘܳܬ ܐܰܒܳܗܰܝ̈ܟ ܘܬܶܬܩܦܶܣ ܠܒܶܝܬ ܩܒܽܘܖ̈ܰܝܟ ܒܰܫܠܳܡ. ܘܠܳܐ ܢܶܚܙ̈ܝܳܢ ܥܰܝܢܰܝ̈ܟ ܒܟܽܠܳܗ̇ ܒܺܝܫܬܳܐ ܕܡܰܝܬܶܐ ܐ̱ܢܳܐ ܥܰܠ ܐܰܬܪܳܐ ܗܳܢܳܐ ܘܥܰܠ ܥܳܡܽܘܖ̈ܰܘܗܝ. ܘܰܐܗܦܶܟܘ ܠܡܰܠܟܳܐ ܦܶܬܓܳܡܳܐ.
29 ܘܫܰܕܰܪ ܡܰܠܟܳܐ. ܘܶܐܬܟܰܢܰܫܘ ܠܘܳܬܶܗ ܟܽܠܗܽܘܢ ܩܰܫܺܝ̈ܫܶܐ ܕܺܝܗܽܘܕܳܐ ܘܕܽܐܘܪܺܫܠܶܡ.
30 ܘܰܣܠܶܩ ܡܰܠܟܳܐ ܠܒܰܝܬܶܗ ܕܡܳܪܝܳܐ. ܘܟܽܠܗܽܘܢ ܕܒܶܝܬ ܝܺܗܽܘܕܳܐ ܘܥܳܡܽܘܖ̈ܶܝܗ̇ ܕܽܐܘܪܺܫܠܶܡ. ܘܟܳܗ̈ܢܶܐ ܘܠܶܘ̈ܳܝܶܐ ܘܟܽܠܶܗ ܥܰܡܳܐ ܡܶܢ ܙܥܽܘܪܳܐ ܘܰܥܕܰܡܳܐ ܠܪܰܒܳܐ. ܘܰܩܪܳܐ ܩܕܳܡܰܝܗܽܘܢ ܟܽܠܗܽܘܢ ܦܶܬܓܳܡ̈ܶܐ ܕܣܶܦܪܳܐ ܕܕܺܝܰܐܬܺܝܩܺܝ ܗܳܕܶܐ ܕܶܐܫܬܟܰܚ ܒܒܰܝܬܶܗ ܕܡܳܪܝܳܐ.
31 ܘܩܳܡ ܡܰܠܟܳܐ ܥܰܠ ܕܽܘܟܬܶܗ. ܘܺܝܡܳܐ ܡܰܘܡܳܬܳܐ ܩܕܳܡ ܡܳܪܝܳܐ. ܠܡܺܐܙܰܠ ܒܳܬܰܪ ܡܳܪܝܳܐ ܠܰܡܗܰܠܳܟܽܘ ܒܽܐܘܖ̈ܚܳܬܶܗ. ܘܰܠܡܶܛܰܪ ܦܽܘܩܕܳܢܰܘ̈ܗܝ ܘܢܳܡܽܘܣܰܘ̈ܗܝ ܘܣܳܗ̈ܕܘܳܬܶܗ. ܒܟܽܠ ܠܶܒܳܐ ܘܰܒܟܽܠ ܢܰܦܫܳܐ. ܠܡܶܥܒܰܕ ܦܶܬܓܳܡ̈ܶܐ ܕܕܺܝܰܐܬܺܝܩܺܝ ܕܰܟܬܺܝܒܺܝܢ ܒܣܶܦܪܳܐ ܗܳܢܳܐ.
32 ܘܩܳܡ ܟܽܠ ܕܶܐܫܬܟܰܚ ܒܽܐܘܪܺܫܠܶܡ. ܘܰܒܒܶܢܝܳܡܶܝܢ ܘܰܥܒܰܪܘ ܥܳܡܽܘܖ̈ܶܐ ܕܽܐܘܪܺܫܠܶܡ ܒܰܩܝܳܡܳܐ ܕܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ.
33 ܘܰܐܥܒܰܪ ܝܽܘܫܺܝܳܐ ܥܒܳܕ̈ܶܐ ܣܢܰܝ̈ܳܐ ܕܰܐܘܒܶܕ ܡܳܪܝܳܐ ܡܶܢ ܩܕܳܡ ܒܢܰܝ̈ ܝܺܣܪܳܐܶܝܠ. ܘܰܥܒܰܕ ܟܽܠܶܗ ܥܰܡܳܐ ܕܶܐܫܬܟܰܚ ܒܺܝܣܪܳܐܶܝܠ. ܘܰܦܠܰܚܘ ܠܡܳܪܝܳܐ ܐܰܠܗܗܽܘܢ. ܘܠܳܐ ܣܛܰܘ ܡܶܢ ܒܳܬܰܪ ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܗܽܘܢ.