2 Chronicles 13
The second Book of Chronicles
܀ ܒ ܕܘܒܪ ܝܘܡ̈ܬܐ ܝܓ ܀
1 ܒܰܫܢܰܬ ܬܡܳܢܰܥܶܣܖ̈ܶܐ ܠܡܰܠܟܽܘܬܶܗ ܕܝܽܘܪܰܒܥܰܡ ܒܰܪ ܢܳܒܳܛ. ܩܳܡ ܒܡܰܠܟܽܘܬܳܐ ܐܰܒܺܝܳܐ ܥܰܠ ܫܰܒܛܳܐ ܕܒܶܝܬ ܝܺܗܽܘܕܳܐ.
2 ܘܰܬܠܳܬ ܫܢܺܝ̈ܢ ܐܰܡܠܶܟ ܒܽܐܘܪܺܫܠܶܡ. ܘܰܫܡܳܐ ܕܶܐܡܶܗ ܡܰܥܟܳܐ ܒܰܪܬ ܐܽܘܪܝܶܠ ܡܶܢ ܪܳܡܬܳܐ.
3 ܘܶܐܣܰܪ ܐܰܒܺܝܳܐ ܓܰܒܖ̈ܶܐ ܥܳܒܕܰܝ̈ ܩܪܳܒܳܐ. ܐܰܪܒܰܥ ܡܳܐܐ ܐܰܠܦܺܝ̈ܢ ܓܰܒܖ̈ܶܐ ܥܠܰܝ̈ܡܶܐ. ܥܕܰܡܳܐ ܕܩܰܒܶܠܘ ܥܠܰܝܗܽܘܢ ܕܢܺܐܙܽܠܘܢ ܘܢܶܥܒܕܽܘܢ ܩܪܳܒܳܐ ܥܰܡ ܝܽܘܪܰܒܥܰܡ ܒܰܪ ܢܳܒܳܛ. ܘܝܽܘܪܰܒܥܰܡ ܒܰܪ ܢܳܒܳܛ ܟܰܢܶܫ ܠܶܗ ܚܰܝܠܳܐ. ܘܶܐܬܳܐ ܕܢܶܥܒܶܕ ܩܪܳܒܳܐ ܒܰܬܡܳܢ ܡܳܐܐ ܐܰܠܦܺܝ̈ܢ ܥܠܰܝ̈ܡܶܐ ܓܰܢ̱ܒܳܖ̈ܰܝ ܚܰܝܠܳܐ.
4 ܘܩܳܡ ܐܰܒܺܝܳܐ ܡܶܢ ܛܽܘܪܳܐ ܕܰܨܡܰܪܝܰܡ. ܕܺܐܝܬ ܒܰܬܚܽܘܡܳܐ ܕܛܽܘܪܳܐ ܕܰܐܦܪܶܝܡ ܘܶܐܡܰܪ. ܫܡܰܥ ܝܽܘܪܰܒܥܰܡ ܒܰܪ ܢܳܒܳܛ ܘܟܽܠܶܗ ܝܺܣܪܳܐܶܝܠ.
5 ܟܒܰܪ ܝܳܕܥܺܝܢ ܗܘܰܝܬܽܘܢ ܕܡܳܪܝܳܐ ܐܰܠܳܗܳܐ ܕܺܝܣܪܳܐܶܝܠ. ܝܰܗܒ ܡܰܠܟܽܘܬܳܐ ܠܕܰܘܺܝܕ ܥܰܠ ܝܺܣܪܳܐܶܝܠ ܠܥܳܠܰܡ. ܠܶܗ ܘܠܰܒܢܰܘ̈ܗܝ ܩܝܳܡܳܐ ܕܡܰܠܟܳܐ.
6 ܘܩܳܡ ܝܽܘܪܰܒܥܰܡ ܒܰܪ ܢܳܒܳܛ ܥܰܒܕܶܗ ܕܰܫܠܶܝܡܽܘܢ ܒܪܶܗ ܕܕܰܘܺܝܕ. ܘܰܡܪܰܕ ܥܰܠ ܡܳܪܶܗ.
7 ܘܟܰܢܶܫ ܠܘܳܬܶܗ ܓܰܒܖ̈ܶܐ ܖ̈ܰܫܺܝܥܶܐ ܒܢܰܝ̈ ܥܰܘܠܳܐ. ܘܶܐܬܥܰܫܰܢ ܥܰܠ ܪܚܰܒܥܰܡ ܒܪܶܗ ܕܰܫܠܶܝܡܽܘܢ. ܘܰܪܚܰܒܥܰܡ ܛܰܠܝܳܐ ܗܘܳܐ ܘܰܛܠܶܐ ܝܰܘܡܺܝ̈ܢ. ܘܠܳܐ ܝܳܕܰܥ ܗܘܳܐ ܡܶܕܶܡ ܠܡܺܐܡܰܪ. ܘܠܳܐ ܒܰܝܐܶܗ ܠܥܰܡܳܐ ܥܰܠ ܫܽܘܥܒܳܕܳܐ ܕܫܰܥܒܶܕ ܐܶܢܽܘܢ ܫܠܶܝܡܽܘܢ ܐܰܒܽܘܗܝ.
8 ܘܳܐܦ ܗܳܫܳܐ ܡܳܢܳܐ ܐܳܡܪܺܝܢ ܐ̱ܢܬܽܘܢ. ܐܶܙܰܠܬܽܘܢ ܐܰܦܪܶܩܬܽܘܢ ܡܶܢܟܽܘܢ ܡܰܠܟܽܘܬܳܐ ܕܒܶܝܬ ܕܰܘܺܝܕ. ܘܶܐܙܰܠܬܽܘܢ ܘܰܦܠܰܚܬܽܘܢ ܠܰܐܠܳܗ̈ܶܐ ܡܺܝ̈ܬܶܐ. ܘܶܐܢܳܐ ܥܰܠ ܫܰܒܛܳܐ ܚܰܕ ܩܳܐܶܡ ܐ̱ܢܳܐ ܒܡܰܠܟܽܘܬܳܐ. ܘܰܐܢ̱ܬܽܘܢ ܫܰܒ̈ܛܶܐ ܣܰܓܺܝ̈ܐܶܐ. ܘܒܰܝܢܳܬܟܽܘܢ ܐܺܝܬ ܥܶܓܠܳܐ ܕܕܰܗܒܳܐ. ܕܰܥܒܰܕ ܠܟܽܘܢ ܝܽܘܪܰܒܥܰܡ ܒܰܪ ܢܳܒܳܛ.
9 ܘܰܐܢ̱ܬܽܘܢ ܐܰܦܪܶܩܬܽܘܢ ܠܟܳܗ̈ܢܶܐ ܒܢܰܘ̈ܗܝ ܕܰܐܗܪܽܘܢ ܘܰܠܠܶܘ̈ܳܝܶܐ. ܘܰܥܒܰܕܬܽܘܢ ܠܟܽܘܢ ܟܽܘܡܖ̈ܶܐ ܡܶܢ ܥܰܡܳܐ ܕܰܐܪܥܳܐ. ܘܟܽܠ ܡܰܢ ܕܥܳܐܶܠ ܠܰܡܩܰܪܳܒܽܘ ܩܽܘܪܒܳܢܳܐ. ܫܳܩܠܺܝܢ ܗܘܰܝܬܽܘܢ ܡܶܢܶܗ ܬܰܘܪܳܐ ܒܰܪ ܒܰܩܪܳܐ. ܘܕܶܟܖ̈ܶܐ ܫܰܒܥܳܐ. ܘܗܳܘܶܐ ܗܘܳܐ ܟܽܘܡܪܳܐ ܠܰܕܠܳܐ ܐܰܠܳܗܺܝ̈ܢ.
10 ܘܰܚܢܰܢ ܠܡܳܪܝܳܐ ܐܰܠܳܗܰܢ ܠܳܐ ܫܒܰܩܢ. ܘܟܳܗ̈ܢܶܐ ܕܰܡܫܰܡܫܺܝܢ ܠܡܳܪܝܳܐ. ܒܢܰܘ̈ܗܝ ܐܶܢܽܘܢ ܕܰܐܗܪܽܘܢ. ܘܠܶܘ̈ܳܝܶܐ ܒܰܥܒܺܝ̈ܕܳܬܗܽܘܢ.
11 ܘܡܰܣܩܺܝܢ ܗܘܰܘ ܠܡܳܪܝܳܐ ܕܶܒܚ̈ܶܐ. ܒܟܽܠ ܨܦܰܪ ܘܰܨܦܰܪ. ܘܰܒܟܽܠ ܪܡܶܫ ܘܰܪܡܶܫ. ܘܩܰܛܖ̈ܽܘܩܶܐ ܕܒܶܣ̈ܡܶܐ. ܘܣܶܕܖ̈ܶܐ ܕܠܰܚܡܳܐ ܥܰܠ ܦܳܬܽܘܖ̈ܶܐ ܕܟܰܝ̈ܳܐ. ܘܰܡܢܳܪܬܳܐ ܕܕܰܗܒܳܐ. ܘܰܫܖ̈ܳܓܰܝܗܶܝܢ. ܘܛܰܠܝܳܐ ܫܪܰܓܬܳܢܳܐ ܡܰܢܗܰܪ ܠܗܶܝܢ. ܒܟܽܠ ܪܡܶܫ ܘܰܪܡܶܫ. ܘܰܚܢܰܢ ܢܳܛܪܺܝܢ ܢܛܽܘܖ̈ܳܬܶܗ ܕܡܳܪܝܳܐ ܐܰܠܳܗܰܢ.
12 ܘܰܐܢ̱ܬܽܘܢ ܕܶܝܢ ܫܒܰܩܬܽܘܢܳܝܗܝ. ܘܶܐܙܰܠܬܽܘܢ ܒܳܬܰܪ ܐܰܠܳܗ̈ܶܐ ܡܺܝ̈ܬܶܐ. ܘܰܦܠܰܚܬܽܘܢ ܐܶܢܽܘܢ. ܘܰܣܓܶܕܬܽܘܢ ܠܗܽܘܢ. ܘܰܫܒܰܩܬܽܘܢ ܠܡܳܪܝܳܐ ܐܰܠܳܗܳܐ ܕܰܐܒܳܗܰܝ̈ܟܽܘܢ ܘܳܐܦ ܐܰܢ̱ܬܽܘܢ ܠܳܐ ܬܰܟܫܪܽܘܢ ܒܥܳܠܡܳܐ.
13 (ܠܝܬ)
14 (ܠܝܬ)
15 ܘܰܗܘܳܐ ܕܟܰܕ ܐܰܪܺܝܡܘ ܩܳܠܗܽܘܢ ܓܰܒܖ̈ܶܐ ܕܒܶܝܬ ܝܺܗܽܘܕܳܐ. ܘܡܳܪܝܳܐ ܬܒܰܪ ܠܝܽܘܪܰܒܥܰܡ ܒܰܪ ܢܳܒܳܛ ܘܠܺܝܣܪܳܐܶܝܠ. ܩܕܳܡ ܝܺܗܽܘܕܳܐ. ܘܰܩܕܳܡ ܐܰܒܺܝܳܐ.
16 ܘܰܥܪܰܩܘ ܒܢܰܝ̈ ܝܺܣܪܳܐܶܝܠ. ܡܶܢ ܩܕܳܡ ܒܢܰܝ̈ ܝܺܗܽܘܕܳܐ.
17 ܘܰܚܪܰܒ ܐܶܢܽܘܢ ܐܰܒܺܝܳܐ ܚܰܪܒܳܐ ܪܰܒܳܐ. ܘܰܢܦܰܠܘ ܓܰܒܖ̈ܶܐ ܡܶܢ ܝܺܣܪܳܐܶܝܠ. ܚܰܡܶܫܡܳܐܐ ܐܰܠܦܺܝ̈ܢ ܓܰܒܖ̈ܶܐ ܥܠܰܝ̈ܡܶܐ.
18 ܘܶܐܬܬܒܰܪܘ ܒܢܰܝ̈ ܝܺܣܪܳܐܶܝܠ ܒܙܰܒܢܳܐ ܗܰܘ ܘܶܐܬܓܰܢ̱ܒܰܪܘ ܒܢܰܝ̈ ܝܺܗܽܘܕܳܐ. ܡܶܛܽܠ ܕܳܐܡܪܺܝܢ. ܣܽܘܡܟܳܢܰܢ ܥܰܠ ܡܳܪܝܳܐ ܐܰܠܳܗܳܐ ܕܰܐܒܳܗ̈ܳܬܰܢ.
19 ܘܰܪܕܰܦ ܐܰܒܺܝܳܐ ܒܳܬܰܪ ܝܽܘܪܰܒܥܰܡ ܘܰܟܒܰܫ ܡܶܢܶܗ ܩܽܘܖ̈ܝܳܐ ܪܰܘܖ̈ܒܳܬܳܐ. ܒܶܝܬܐܺܝܠ ܘܡܶܐܟ̈ܠܳܬܳܗ̇. ܫܳܠܶܐ ܘܡܶܐܟ̈ܠܳܬܳܗ̇. ܥܶܦܪܽܘܢ ܘܡܶܐܟ̈ܠܳܬܳܗ̇.
20 ܘܰܙܥܰܪ ܠܶܗ ܚܰܝܠܳܐ ܠܝܽܘܪܰܒܥܰܡ. ܬܽܘܒ ܒܝܰܘ̈ܡܳܬܶܗ ܕܰܐܒܺܝܳܐ. ܘܰܡܚܳܝܗܝ ܡܳܪܝܳܐ ܠܝܽܘܪܰܒܥܰܡ. ܘܡܺܝܬ.
21 ܘܶܐܬܓܰܢ̱ܒܰܪ ܐܰܒܺܝܳܐ. ܘܰܢܣܰܒ ܠܶܗ ܢܶܫ̈ܶܐ ܐܰܪܒܬܰܥܶܣܖ̈ܶܐ. ܘܶܐܬܺܝܠܶܕܘ ܠܶܗ ܒܢܰܝ̈ܳܐ ܕܶܟܖ̈ܶܐ ܥܶܣܪܺܝܢ ܘܶܫܬܳܐ. ܘܰܒܢ̈ܳܬܐ ܢܶܩ̈ܒܳܬܳܐ ܫܶܬܬܰܥܶܣܖ̈ܶܐ.
22 ܘܫܰܪܟܳܐ ܕܦܶܬܓܳܡܰܘ̈ܗܝ ܐܘܖ̈ܚܳܬܶܗ ܗܳܐ ܟܬܺܝܒܺܝܢ ܒܡܰܕܖ̈ܳܫܳܐ ܕܥܰܕܽܘ ܢܒܺܝܳܐ.