Revelation 20
The Book of Revelation
܀ ܓܠܝܢܐ ܕܝܘܚܢܢ ܟ ܀
1- ܘܰܚܙܺܝܬ ܡܰܠܰܐܟܳܐ ܕܢܳܚܶܬ ܡܶܢ ܫܡܰܝܳܐ ܕܺܐܝܬ ܠܶܗ ܩܠܺܝܕܳܐ ܕܰܬܗܽܘܡܳܐ. ܘܫܺܫܰܠܬܳܐ ܪܰܒܬܳܐ ܒܺܐܝܕܳܐ ܕܺܝܠܶܗ.
2- ܘܠܰܒܟܶܗ ܠܬܰܢܺܝܢܳܐ ܗܰܘ ܚܶܘܝܳܐ ܗܰܘ ܩܰܕܡܳܝܳܐ܆ ܗܰܘ ܕܺܐܝܬܰܘܗ̱ܝ ܡܪܰܡܝܳܢܳܐ ܘܣܳܛܳܢܳܐ. ܗܰܘ ܕܰܐܛܥܺܝ ܠܡܶܬܥܰܡܪܳܢܺܝܬܳܐ. ܘܰܐܣܪܳܗ̇ ܐܳܠܶܦ ܫܢܰܝ̈ܳܐ.
3- ܘܰܐܪܡܝܶܗ ܒܰܬܗܽܘܡܳܐ. ܘܶܐܚܰܕ ܘܰܛܒܰܥ ܠܥܶܠ ܡܶܢܶܗ܆ ܐܰܝܟܰܢܳܐ ܕܠܳܐ ܢܰܛܥܶܐ ܬܽܘܒ ܠܥܰܡ̱̈ܡܶܐ܇ ܥܕܰܡܳܐ ܕܰܢܫܰܠܶܡ ܗܳܠܶܝܢ ܐܰܠܦܰܝ̈ܳܐ ܫܢܰܝ̈ܳܐ. ܒܳܬܰܪ ܗܳܠܶܝܢ ܕܶܝܢ ܢܶܫܬܪܶܐ ܩܰܠܺܝܠ ܙܰܒܢܳܐ.
4- ܘܰܚܙܺܝܬ ܟܽܘܪ̈ܣܰܘܳܬܳܐ ܘܺܝܬܶܒܘ ܥܠܰܝܗܽܘܢ. ܘܕܺܝܢܳܐ ܐܶܬܺܝܗܶܒ ܠܗܽܘܢ. ܘܰܠܢܰܦ̈ܫܳܬܳܐ ܗܳܠܶܝܢ ܕܶܐܬܦܰܣܰܩ̈ܶܝܢ ܡܶܛܽܠ ܣܳܗܕܽܘܬܳܐ ܕܝܶܫܽܘܥ ܘܡܶܛܽܠ ܡܶܠܬܳܐ ܕܰܐܠܳܗܳܐ: ܘܗܳܢܽܘܢ ܐ̱ܢܳܫܺܝ̈ܢ ܕܠܳܐ ܣܓܶܕܘ ܠܗܰܘ ܚܰܝܘܰܬ ܫܶܢܳܐ ܘܠܳܐ ܠܨܰܠܡܳܐ ܕܺܝܠܶܗ: ܘܠܳܐ ܢܣܰܒܘ ܠܪܽܘܫܡܳܐ ܥܰܠ ܒܶܝܬ ܥܰܝ̈ܢܶܐ ܥܰܠ ܐܺܝܕܳܐ ܕܺܝܠܗܽܘܢ܆ ܘܰܚܝܰܘ ܘܰܐܡܠܶܟܘ ܥܰܡ ܡܫܺܝܚܳܐ ܕܺܝܠܗܽܘܢ܇ ܗܳܢܶܝܢ ܐܰܠܦܰܝ̈ܳܐ ܫܢܰܝ̈ܳܐ. ܘܫܰܪܟܳܐ ܕܡܺܝ̈ܬܶܐ ܠܳܐ ܚܝܰܘ. ܥܕܰܡܳܐ ܕܶܐܫܬܰܡܠܺܝ ܗܳܢܶܝܢ ܐܰܠܦܳܐ ܫܢܰܝ̈ܳܐ܀
5- ܘܗܳܕܳܐ ܗ̱ܝ ܩܝܳܡܬܳܐ ܗܳܝ ܩܰܕܡܳܝܬܳܐ.
6- ܛܽܘܒܬܳܢܰܐ ܗ̱ܘ ܘܩܰܕܺܝܫܳܐ ܗܰܘ ܕܺܐܝܬ ܠܶܗ ܡܢܳܬܳܐ ܒܰܩܝܳܡܬܳܐ ܗܳܝ ܩܰܕܡܳܝܬܳܐ. ܥܰܠ ܗܳܢܽܘܢ ܡܰܘܬܳܐ ܬܶܢܝܳܢܳܐ ܠܳܐ ܐܺܝܬ ܠܶܗ ܫܽܘܠܛܳܢܳܐ. ܐܶܠܳܐ ܢܶܗܘܽܘܢ ܐܺܝܬܰܝܗܽܘܢ ܟܳܗ̈ܢܶܐ ܕܰܐܠܳܗܳܐ ܘܕܰܡܫܺܝܚܳܐ ܕܺܝܠܶܗ܆ ܘܢܰܡܠܟܽܘܢ ܥܰܡܶܗ ܗܳܠܶܝܢ ܐܰܠܦܳܐ ܫܢܰܝ̈ܳܐ܀
7- ܘܶܐܡܰܬܝ ܕܢܶܫܬܪܶܐ ܗܽܘ ܣܳܛܳܢܳܐ ܡܶܢ ܒܶܝܬ ܢܛܽܘܪܬܳܐ ܕܺܝܠܶܗ.
8- ܘܢܶܦܽܘܩ ܠܡܰܛܥܳܝܽܘ ܠܥܰܡ̱̈ܡܶܐ ܗܳܠܶܝܢ ܕܒܰܐܪܒܰܥ ܓܽܘ̈ܢܰܘܳܬܳܗ̇ ܕܰܐܪܥܳܐ. ܠܓܽܘܓ ܘܰܠܡܳܓܽܘܓ. ܘܠܰܡܟܰܢܳܫܽܘ ܐܶܢܽܘܢ ܠܰܩܪܳܒܳܐ. ܗܳܠܶܝܢ ܕܡܶܢܝܳܢܳܐ ܕܺܝܠܗܽܘܢ ܐܰܝܟ ܚܳܠܳܐ ܕܝܰܡܳܐ.
9- ܘܰܣܠܶܩܘ ܥܰܠ ܦܬܳܝܳܗ̇ ܕܰܐܪܥܳܐ܆ ܘܚܰܕܪܽܘܗ̇ ܠܡܰܫܪܺܝܬܳܐ ܕܩܰܕܺܝ̈ܫܶܐ ܘܠܰܡܕܺܝܢ̱ܬܳܐ ܗܳܝ ܚܰܒܺܝܒܬܳܐ. ܘܢܶܚܬܰܬ ܢܽܘܪܳܐ ܡܶܢ ܐܰܠܳܗܳܐ ܡܶܢ ܫܡܰܝܳܐ. ܘܶܐܟܠܰܬ ܐܶܢܽܘܢ.
10- ܘܳܐܟܶܠܩܰܪܨܳܐ ܗܰܘ ܕܰܐܛܥܺܝ ܐܶܢܽܘܢ܆ ܐܶܬܬܰܪܡܺܝ ܒܝܰܡܳܐ ܕܢܽܘܪܳܐ ܘܰܕܟܶܒܪܺܝܬܳܐ܇ ܐܰܝܟܳܐ ܕܳܐܦ ܗܰܘ ܚܰܝܘܰܬ ܫܶܢܳܐ ܘܗܰܘ ܢܒܺܝܳܐ ܕܰܓܳܠܳܐ. ܘܢܶܫܬܰܢܩܽܘܢ ܐܺܝܡܳܡܳܐ ܘܠܺܠܝܳܐ ܠܥܳܠܡ̈ܶܐ ܕܥܳܠܡ̈ܶܐ܀
11- ܘܰܚܙܺܝܬ ܬܪܽܘܢܽܘܣ ܪܰܒܳܐ ܘܚܶܘܳܪܳܐ. ܘܰܠܗܰܘ ܕܝܳܬܶܒ ܠܥܶܠ ܡܶܢܶܗ܆ ܗܰܘ ܕܡܶܢ ܦܰܪܨܽܘܦܶܗ ܥܶܪܩܰܬ ܐܰܪܥܳܐ ܘܰܫܡܰܝܳܐ܆ ܘܕܽܘܟܬܳܐ ܠܳܐ ܐܶܫܬܰܟܚܰܬ ܠܗܽܘܢ.
12- ܘܰܚܙܺܝܬ ܠܡܺܝ̈ܬܶܐ ܠܪܰܘܪ̈ܒܶܐ ܘܠܰܙܥܽܘܪ̈ܶܐ ܟܰܕ ܩܳܝܡܺܝܢ ܩܕܳܡ ܬܪܽܘܢܽܘܣ. ܘܰܟ̈ܬܳܒܶܐ ܐܶܬܦܬܰܚܘ. ܘܰܐ̱ܚܪܺܢܳܐ ܟܬܳܒܳܐ ܐܶܬܦܬܰܚ ܗܰܘ ܕܺܐܝܬܰܘܗ̱ܝ ܕܚܰܝ̈ܶܐ. ܘܶܐܬܬܕܺܝܢܘ ܡܺܝ̈ܬܶܐ ܡܶܢ ܗܳܢܶܝܢ ܕܰܟܬܺܝ̈ܒܳܢ ܒܰܟ̈ܬܳܒܶܐ ܐܰܝܟ ܥ̈ܒܳܕܶܐ ܕܺܝܠܗܽܘܢ.
13- ܘܝܰܗ̱ܒ ܝܰܡܳܐ ܡܺܝ̈ܬܶܐ ܗܳܢܽܘܢ ܕܒܶܗ. ܘܡܰܘܬܳܐ ܘܰܫܝܽܘܠ ܝܰܗ̱ܒܘ ܡܺܝ̈ܬܶܐ ܗܳܢܽܘܢ ܕܰܒܗܽܘܢ. ܘܶܐܬܬܕܺܝܢ ܟܽܠ ܚܰܕ ܐܰܝܟ ܥ̈ܒܳܕܶܐ ܕܺܝܠܗܽܘܢ.
14- ܘܡܰܘܬܳܐ ܘܰܫܝܽܘܠ ܐܶܬܬܰܪܡܺܝܘ ܒܗܳܝ ܝܰܡܬܳܐ ܕܢܽܘܪܳܐ. ܗܳܢܳܐ ܡܰܘܬܳܐ ܬܶܢܝܳܢܳܐ ܐܺܝܬܰܘܗ̱ܝ܆ ܝܰܡܬܳܐ ܗܳܝ ܕܢܽܘܪܳܐ.
15- ܘܶܐܢ ܐ̱ܢܳܫ ܠܳܐ ܐܶܫܬܟܰܚ ܕܒܰܟܬܳܒܳܐ ܕܚܰܝ̈ܶܐ ܟܬܺܝܒ܆ ܐܶܬܬܰܪܡܺܝ ܒܝܰܡܬܳܐ ܗܳܝ ܕܢܽܘܪܳܐ܀