Revelation 19
The Book of Revelation
܀ ܓܠܝܢܐ ܕܝܘܚܢܢ ܝܛ ܀
1- ܒܳܬܰܪ ܗܳܠܶܝܢ܆ ܫܶܡܥܶܬ ܩܳܠܳܐ ܪܰܒܳܐ ܕܟܶܢܫܳܐ ܣܰܓܺܝܳܐܐ ܒܰܫܡܰܝܳܐ ܕܳܐܡܪܺܝܢ܆ ܗܰܠܶܠܽܘܝܰܐ. ܦܽܘܪܩܳܢܳܐ ܘܚܰܝܠܳܐ ܘܬܶܫܒܽܘܚܬܳܐ ܘܺܐܝܩܳܪܳܐ ܠܰܐܠܳܗܳܐ ܕܺܝܠܰܢ.
2- ܡܶܛܽܠ ܕܫܰܪܺܝܪܺܝܢ ܘܟܺܐܢܺܝܢ ܕܺܝ̈ܢܶܐ ܕܺܝܠܶܗ. ܡܶܛܽܠ ܕܕܳܢ ܠܙܳܢܺܝܬܳܐ ܗܳܝ ܪܰܒܬܳܐ܇ ܗܳܝ ܐܰܝܕܳܐ ܕܚܰܒܠܰܬ ܠܰܐܪܥܳܐ ܒܙܳܢܝܽܘܬܳܐ ܕܺܝܠܳܗ̇܆ ܘܰܬܒܰܥ ܠܰܕܡܳܐ ܕܥܰܒ̈ܕܶܐ ܕܺܝܠܶܗ ܡܶܢ ܐܺܝܕܳܐ ܕܺܝܠܳܗ̇.
3- ܘܰܕܬܰܪܬܶܝܢ ܐܶܡܰܪ ܗܰܠܶܠܽܘܝܰܐ܆ ܘܬܶܢܳܢܳܐ ܕܺܝܠܳܗ̇ ܣܳܠܶܩ ܗ̱ܘܳܐ܆ ܠܥܳܠܡ̈ܶܐ ܕܥܳܠܡ̈ܶܐ.
4- ܘܰܢܦܰܠܘ ܗܳܠܶܝܢ ܩܰܫܺܝ̈ܫܶܐ ܥܶܣܪܺܝܢ ܘܰܐܪܒܥܳܐ܇ ܘܗܳܢܶܝܢ ܐܰܪܒܰܥ ܚܰܝ̈ܘܳܬܳܐ܆ ܘܰܣܓܶܕܘ ܠܰܐܠܳܗܳܐ ܗܰܘ ܕܝܳܬܶܒ ܥܰܠ ܬܪܽܘܢܽܘܣ ܟܰܕ ܐܳܡܪܺܝܢ. ܐܰܡܺܝܢ ܗܰܠܶܠܽܘܝܰܐ.
5- ܘܩܳܠܳܐ ܢܦܰܩ ܡܶܢ ܬܪܽܘܢܽܘܣ ܕܳܐܡܰܪ. ܫܰܒܰܚܘ ܠܰܐܠܳܗܳܐ ܕܺܝܠܰܢ ܟܽܠܗܽܘܢ ܥܰܒ̈ܕܶܐ ܕܺܝܠܶܗ. ܘܗܳܢܽܘܢ ܕܕܳܚܠܺܝܢ ܠܶܗ ܙܥܽܘܪ̈ܶܐ ܘܪܰܘܪ̈ܒܶܐ܀
6- ܘܫܶܡܥܶܬ ܐܰܝܟ ܩܳܠܳܐ ܕܟܶܢܫܳܐ ܣܰܓܺܝܳܐܐ܆ ܘܰܐܝܟ ܩܳܠܳܐ ܕܡܰܝ̈ܳܐ ܣܰܓܺܝ̈ܶܐܐ. ܘܰܐܝܟ ܩܳܠܳܐ ܕܪ̈ܰܥܡܶܐ ܚܰܝ̈ܠܬܳܢܶܐ ܕܳܐܡܪܺܝܢ ܗܰܠܶܠܽܘܝܰܐ. ܡܶܛܽܠ ܕܰܐܡܠܶܟ ܡܳܪܝܳܐ ܐܰܠܳܗܳܐ ܕܺܝܠܰܢ ܗܰܘ ܐܰܚܺܝܕ ܟܽܠ.
7- ܢܶܚܕܶܐ ܘܢܶܪܘܰܙ. ܢܶܬܶܠ ܬܶܫܒܽܘܚܬܳܐ ܠܶܗ ܡܶܛܽܠ ܕܶܐܬܳܬ ܡܶܫܬܽܘܬܶܗ ܕܗܰܘ ܐܶܡܪܳܐ. ܘܰܐܢ̱ܬܬܳܐ ܕܺܝܠܶܗ ܛܰܝܒܰܬ ܗܺܝ ܠܳܗ̇.
8- ܘܶܐܬܺܝܗܶܒ ܠܳܗ̇ ܐܰܝܟܰܢܳܐ ܕܬܶܬܥܰܛܰܦ ܕܒܽܘܨܳܐ ܢܰܨܺܝܚܳܐ ܘܕܰܟܝܳܐ. ܗܰܘ ܕܒܽܘܨܳܐ ܙܶܕ̈ܩܶܐ ܕܩܰܕܺܝ̈ܫܶܐ ܐܺܝܬܰܘܗ̱ܝ.
9- ܘܶܐܡܰܪ ܠܺܝ ܟܬܽܘܒ. ܛܽܘ̈ܒܬܳܢܶܐ ܐܶܢܽܘܢ ܗܳܢܽܘܢ ܕܠܰܚܫܳܡܺܝܬܳܐ ܕܡܶܫܬܽܘܬܶܗ ܕܶܐܡܪܳܐ ܩܪܶܝܢ. ܘܶܐܡܰܪ ܠܺܝ. ܗܳܠܶܝܢ ܡ̈ܶܠܶܐ ܕܺܝܠܝ ܫܰܪܺܝܪ̈ܳܬܳܐ ܕܰܐܠܳܗܳܐ ܐܺܝܬܰܝܗܶܝܢ.
10- ܘܢܶܦܠܶܬ ܩܕܳܡ ܪ̈ܶܓܠܶܐ ܕܺܝܠܶܗ ܠܡܶܣܓܰܕ ܠܶܗ. ܘܶܐܡܰܪ ܠܺܝ܆ ܚܙܺܝ. ܠܳܐ܆ ܟܢܳܬܳܐ ܕܺܝܠܳܟ ܐܺܝܬܰܝ܆ ܘܕܰܐܚ̈ܶܐ ܕܺܝܠܳܟ ܗܳܢܽܘܢ ܕܺܐܝܬ ܠܗܽܘܢ ܣܳܗܕܽܘܬܳܐ ܕܝܶܫܽܘܥ. ܠܰܐܠܳܗܳܐ ܣܓܽܘܕ. ܗܺܝ ܓܶܝܪ ܣܳܗܕܽܘܬܳܐ ܕܝܶܫܽܘܥ ܐܺܝܬܶܝܗ̇܆ ܗܰܘ ܪܽܘܚܳܐ ܕܰܢܒܺܝܽܘܬܳܐ܀
11- ܘܰܚܙܺܝܬ ܠܰܫܡܰܝܳܐ ܕܰܦܬܺܝܚ܆ ܘܗܳܐ ܣܽܘܣܝܳܐ ܚܶܘܳܪܳܐ. ܘܗܰܘ ܕܝܳܬܶܒ ܥܠܰܘܗ̱ܝ ܡܶܬܩܪܶܐ ܡܗܰܝܡܢܳܐ ܘܫܰܪܺܝܪܳܐ܆ ܘܰܒܙܰܕܺܝܩܽܘܬܳܐ ܕܳܐܶܢ ܘܡܰܩܪܶܒ.
12- ܗܳܢܶܝܢ ܕܶܝܢ ܥܰܝ̈ܢܰܘܗ̱ܝ ܐܰܝܟ ܫܰܠܗܶܒܺܝܬܳܐ ܕܢܽܘܪܳܐ. ܘܥܰܠ ܪ̈ܺܝܫܶܐ ܕܺܝܠܶܗ ܬܳܐܓ̈ܶܐ ܣܰܓܺܝ̈ܶܐܐ. ܕܺܐܝܬ ܠܶܗ ܫܡܳܗ̈ܶܐ ܕܰܟܬܺܝܒܺܝܢ ܘܰܫܡܳܐ ܕܰܟܬܺܝܒ܆ ܠܗܰܘ ܕܠܳܐ ܐ̱ܢܳܫ ܝܳܕܰܥ ܐܶܠܳܐ ܐܶܢ ܗܽܘ.
13- ܘܰܡܥܰܛܰܦ ܡܳܐܢܳܐ ܕܰܙܠܺܝܚ ܒܰܕܡܳܐ. ܘܰܩܪܳܐ ܫܡܳܐ ܕܺܝܠܶܗ ܗܰܘ ܡܶܠܬܳܐ ܕܰܐܠܳܗܳܐ.
14- ܘܦܳܠܰܚ̈ܘܳܬܳܐ ܗܳܠܶܝܢ ܕܒܰܫܡܰܝܳܐ ܢܰܩܺܝܦܺܝܢ ܗ̱ܘܰܘ ܠܶܗ ܥܰܠ ܪ̈ܰܟܫܳܐ ܚܶܘܳܪ̈ܶܐ. ܕܰܠܒܺܝܫܺܝܢ ܕܒܽܘܨܳܐ ܚܶܘܳܪܳܐ ܕܰܟܝܳܐ.
15- ܘܡܶܢ ܦܽܘܡܳܐ ܕܺܝܠܶܗ ܢܳܦܶܩ ܣܰܝܦܳܐ ܚܰܪܺܝܦܳܐ ܕܰܬܪܶܝܢ ܦܽܘ̈ܡܶܐ. ܐܰܝܟܰܢܳܐ ܕܒܶܗ ܢܶܡܚܶܐ ܠܥܰܡ̱̈ܡܶܐ. ܘܗܽܘ ܢܶܪܥܶܐ ܐܶܢܽܘܢ ܒܚܽܘܛܪܳܐ ܕܦܰܪܙܠܳܐ. ܘܗܽܘ ܢܕܽܘܫ ܡܰܥܨܰܪܬܳܐ ܕܚܰܡܪܳܐ ܕܚܶܡܬܳܐ ܕܪܽܘܓܙܶܗ ܕܰܐܠܳܗܳܐ ܐܰܚܺܝܕ ܟܽܠ.
16- ܘܺܐܝܬ ܠܶܗ ܥܰܠ ܡܳܐܢܳܐ ܥܰܠ ܥܰܛܡܳܐ ܕܺܝܠܶܗ܆ ܫܡܳܗ̈ܶܐ ܕܰܟܬܺܝܒܺܝܢ. ܡܰܠܟܳܐ ܕܡ̈ܰܠܟܶܐ ܘܡܳܪܝܳܐ ܕܡܳܪ̈ܰܘܳܬܳܐ܀
17- ܘܰܚܙܺܝܬ ܡܰܠܰܐܟܳܐ ܟܰܕ ܩܳܐܶܡ ܒܰܫܡܰܝܳܐ. ܘܰܩܥܳܐ ܩܳܠܳܐ ܪܰܒܳܐ܆ ܟܰܕ ܐܳܡܰܪ ܠܟܽܠܗܶܝܢ ܦܳܪ̈ܚܳܬܳܐ ܗܳܠܶܝܢ ܕܦܳܪ̈ܚܳܢ ܒܡܶܨܥܰܬ ܫܡܰܝܳܐ. ܬܰܘ ܐܶܬܟܰܢِܫܘ ܠܰܚܫܳܡܺܝܬܳܐ ܗܳܝ ܪܰܒܬܳܐ ܕܰܐܠܳܗܳܐ܆
18- ܐܰܝܟܰܢܳܐ ܕܬܶܐܟܠܽܘܢ ܒܶܣܪ̈ܶܐ ܕܡ̈ܰܠܟܶܐ ܘܒܶܣܪ̈ܶܐ ܕܪ̈ܺܝܫܳܢܰܝ ܐܰܠܦܰܝ̈ܳܐ. ܘܒܶܣܪ̈ܶܐ ܕܚܰܝ̈ܠܬܳܢܶܐ. ܘܒܶܣܪ̈ܶܐ ܕܪ̈ܰܟܫܳܐ܆ ܘܰܕܗܳܢܽܘܢ ܕܝܳܬܒܺܝܢ ܥܠܰܝܗܽܘܢ. ܘܒܶܣܪ̈ܶܐ ܕܟܽܠܗܽܘܢ ܒܢ̈ܰܝ ܚܺܐܪ̈ܶܐ ܘܰܕܥܰܒ̈ܕܶܐ. ܘܕܰܙܥܽܘܪ̈ܶܐ ܘܰܕܪܰܘܪ̈ܒܶܐ܀
19- ܘܰܚܙܺܝܬ ܠܗܰܘ ܚܰܝܘܰܬ ܫܶܢܳܐ ܘܰܠܡ̈ܰܠܟܶܐ ܕܰܐܪܥܳܐ ܘܰܠܦܳܠܚܽܘܬܳܐ ܕܺܝܠܗܽܘܢ. ܕܰܟܢܺܝܫܺܝܢ ܠܡܶܥܒܰܕ ܩܪܳܒܳܐ܆ ܥܰܡ ܗܰܘ ܕܝܳܬܶܒ ܥܰܠ ܣܽܘܣܝܳܐ ܘܥܰܡ ܦܳܠܰܚ̈ܘܳܬܳܐ ܕܺܝܠܶܗ.
20- ܘܶܐܬܬܨܺܝܕ ܗܰܘ ܚܰܝܘܰܬ ܫܶܢܳܐ܁ ܘܗܰܘ ܢܒܺܝܳܐ ܕܰܓܳܠܳܐ ܕܥܰܡܳܗ̇. ܗܰܘ ܕܰܥܒܰܕ ܗܳܠܶܝܢ ܐܳܬܘ̈ܳܬܳܐ ܩܕܳܡܰܘܗ̱ܝ܇ ܕܰܒܗܶܝܢ ܐܰܛܥܺܝ ܠܗܳܠܶܝܢ ܕܰܢܣܰܒܘ ܪܽܘܫܡܳܐ ܕܗܰܘ ܚܰܝܘܰܬ ܫܶܢܳܐ. ܘܰܠܗܳܠܶܝܢ ܕܰܣܓܶܕܘ ܠܨܰܠܡܳܐ ܕܺܝܠܶܗ. ܘܟܰܕ ܚܰܝܺܝܢ ܐܶܬܬܰܪܡܺܝܘ ܬܪ̈ܰܝܗܽܘܢ ܒܝܰܡܬܳܐ ܕܢܽܘܪܳܐ܆ ܗܳܝ ܕܝܳܩܕܳܐ ܒܟܶܒܪܺܝܬܳܐ.
21- ܘܰܕܗܳܢܽܘܢ ܕܫܰܪܟܳܐ ܐܶܬܩܰܛܰܠܘ ܒܣܰܝ̈ܦܶܐ ܕܗܰܘ ܕܝܳܬܶܒ ܥܰܠ ܣܽܘܣܝܳܐ܇ ܒܗܰܘ ܕܰܢܦܰܩ ܡܶܢ ܦܽܘܡܳܐ ܕܺܝܠܶܗ. ܘܟܽܠܗܶܝܢ ܦܳܪ̈ܚܳܬܳܐ ܣܒܰܥܶܝ̈ܢ ܡܶܢ ܒܶܣܪܳܐ ܕܺܝܠܗܽܘܢ܀