Nehemiah 2
The Book of Nehemiah
܀ ܢܚܡܝܐ ܒ ܀
1 ܘܶܐܢܳܐ ܗܘܺܝܬ ܫܳܩܝܳܐ ܠܡܰܠܟܳܐ. ܗܳܝܕܶܝܢ ܒܺܝܪܰܚ ܢܺܝܣܳܢ: ܒܰܫܢܰܬ ܥܶܣܪܺܝܢ ܠܰܐܪܛܰܚܫܶܫܬ ܡܰܠܟܳܐ: ܚܰܡܪܳܐ ܡܰܫܩܶܐ ܗ̱ܘܺܝܬ ܩܕܳܡ ܡܰܠܟܳܐ. ܘܫܶܩܠܶܬ ܚܰܡܪܳܐ ܘܝܶܗܒܶ݀ܬ ܠܡܰܠܟܳܐ: ܘܠܳܐ ܗܘܺܝܬ ܒܺܝܫ ܩܕܳܡܰܘܗܝ.
2 ܘܶܐܡܰܪ ܠܺܝ ܡܰܠܟܳܐ: ܡܶܛܽܠ ܡܳܢܳܐ ܐܰܦܰܝ̈ܟ ܒܺܝ̈ܫܳܢ. ܘܰܐܢ̱ܬ ܠܳܐ ܗܘܰܝܬ ܟܪܺܝܗ. ܠܰܝܬ ܗܳܢܳܐ: ܐܶܠܳܐ ܐܶܢ ܒܺܝܫܽܘܬ ܠܶܒܳܐ. ܘܕܶܚ̣ܠܶܬ ܣܰܓܺܝ ܛܳܒ.
3 ܘܶܐܡܪܶܬ ܠܡܰܠܟܳܐ: ܡܰܠܟܳܐ: ܠܥܳܠܰܡ ܚܺܝܝ. ܡܶܛܽܠ ܡܳܢܳܐ ܠܳܐ ܢܶܒ̈ܐܫܳܢ ܐܰܦܰܝ̈: ܕܰܡܕܺܝܢ̱ܬܳܐ ܕܒܶܝܬ ܡܰܠܟܽܘܬ ܐܰܒܳܗ̈ܰܝ ܚܰܪܒܳܐ. ܘܬܰܖ̈ܥܶܝܗ̇ ܡܰܘܩܕܺܝܢ ܒܢܽܘܪܳܐ.
4 ܘܶܐܡܰܪ ܠܺܝ ܡܰܠܟܳܐ: ܡܶܛܽܠ ܡܳܢܳܐ ܒܥܰܝܬ: ܘܨܰܠܺܝܬ ܩܕܳܡ ܐܰܠܳܗܳܐ ܕܰܫܡܰܝܳܐ.
5 ܘܶܐܡܪܶܬ ܠܡܰܠܟܳܐ: ܐܶܢ ܥܰܠ ܡܰܠܟܳܐ: ܛܳܒ. ܘܶܐܢ ܫܳܦܰܪ ܐ̱ܢܳܐ ܥܰܒܕܳܟ ܩܕܳܡܝܟ: ܬܫܰܕܪܰܢܝ ܠܰܝܗܽܘܕ ܡܕܺܝܢ̱ܬܳܐ: ܠܒܶܝܬ ܩܒܽܘܪܳܐ ܕܰܐܒܳܗܰܝ̈: ܘܶܐܒܢܶܝܗ̇.
6 ܘܶܐܡܰܪ ܠܺܝ ܡܰܠܟܳܐ: ܫܳܛܝܳܐ: ܥܰܕ ܐܶܡܰܬܝ ܐܳܙܶܠ ܘܳܐܬܶܐ. ܘܰܫܦܰܪ ܩܕܳܡ ܡܰܠܟܳܐ: ܘܫܰܕܪܰܢܝ. ܘܝܰܗܒ ܠܺܝ ܙܰܒܢܳܐ.
7 ܘܶܐܡܪܶܬ ܠܡܰܠܟܳܐ: ܐܶܢ ܥܰܠ ܡܰܠܟܳܐ ܫܰܦܺܝܪ: ܢܶܟܬܒܽܘܢ ܠܺܝ ܐܶܓܰܪܬܳܐ ܠܘܳܬ ܫܰܠܺܝܛܳܐ ܕܒܰܥܒܰܪ ܢܰܗܪܳܐ: ܕܢܰܥܒܪܽܘܢܳܢܝ ܥܕܰܡܳܐ ܕܺܐܙܰܠ ܠܺܝܗܽܘܕ.
8 ܘܶܐܓܰܪܬܳܐ ܠܘܳܬ ܐܳܣܳܦ ܢܳܛܰܪ ܦܰܪܕܰܝܣܳܐ ܕܡܰܠܟܳܐ: ܘܢܶܬܶܠ ܠܺܝ ܩܰܝ̈ܣܶܐ ܠܡܶܥܒܰܕ ܬܰܖ̈ܥܰܝ ܒܰܝܬܳܐ ܘܰܕܒܺܝܪܬܳܐ: ܘܫܽܘܖ̈ܶܝܗ̇ ܕܰܡܕܺܝܢ̱ܬܳܐ: ܘܰܠܒܰܝܬܳܐ ܕܥܳܐܶܠ ܐ̱ܢܳܐ ܠܶܗ: ܘܝܰܗܒ ܠܺܝ ܡܰܠܟܳܐ ܐܰܝܟ ܐܺܝܕܶܗ ܕܰܐܠܳܗܳܐ ܕܰܐܛܐܒܰܬ ܠܺܝ.
9 ܘܶܐܬܺܝܬ ܠܘܳܬ ܫܰܠܺܝܛܳܐ ܕܒܰܥܒܰܪ ܢܰܗܪܳܐ. ܘܝܶܗܒܶܬ ܠܶܗ ܐܶܓܰܪܬܳܐ ܕܡܰܠܟܳܐ. ܘܫܰܕܰܪ ܥܰܡܝ ܡܰܠܟܳܐ ܪܰܒ ܚܰܝܠܳܐ ܚܰܕ ܕܦܰܖ̈ܳܫܶܐ.
10 ܘܰܫ̣ܡܰܥ ܣܰܡܒܠܳܛ ܚܰܘܪܳܢܳܝܳܐ ܘܛܽܘܒܝܳܐ ܥܰܒܕܳܐ ܕܥܰܡܽܘܢܳܝ̈ܶܐ. ܘܶܐܬܒܰܐܫܰܬ ܠܗܽܘܢ ܒܺܝܫܳܐܺܝܬ ܥܰܠ ܕܶܐܬܳܐ ܒܰܪܢܳܫܳܐ ܠܡܶܒܥܳܐ ܛܳܒܬܳܐ ܥܰܠ ܒܢܰܝ̈ ܝܺܣܪܳܐܶܝܠ.
11 ܘܶܐܬܺܝܬ ܠܽܐܘܪܺܫܠܶܡ: ܘܰܗܘܺܝܬ ܬܰܡܳܢ ܝܰܘ̈ܡܳܬܳܐ ܬܠܳܬܳܐ.
12 ܘܩܳܡܶܬ ܒܠܺܠܝܳܐ ܐܶܢܳܐ ܘܓܰܒܖ̈ܶܐ ܗܳܢܽܘܢ. ܕܶܐܬܘ ܗ̱ܘܰܘ ܥܰܡܝ. ܘܠܳܐ ܚܰܘܺܝܬ ܠܐ̱ܢܳܫ ܒܡܶܕܶܡ ܕܰܐܪܡܺܝ ܐܰܠܳܗܳܐ ܒܠܶܒܝ ܠܡܶܥܒܰܕ ܒܽܐܘܪܺܫܠܶܡ. ܘܰܒܥܺܝܪܳܐ ܠܰܝܬ ܗ̱ܘܳܐ ܥܰܡܝ: ܐܶܠܳܐ ܐܶܢ ܒܥܺܝܪܳܐ ܕܰܪܟܺܝܒ ܗܘܺܝ݀ܬ ܥܠܶܝܗ̇.
13 ܘܢܶܦܩܶ݀ܬ ܥܰܠ ܬܰܪܥܳܐ ܕܢܰܚܠܳܐ ܒܠܺܠܝܳܐ: ܠܰܐܦܰܝ̈ ܥܺܝܢ ܬܶܠ̈ܠܺܝܢ: ܘܰܠܬܰܪܥܳܐ ܕܶܐܣܦܽܘܬ ܘܰܗܘܺܝ݀ܬ ܣܳܟܰܪ ܒܫܽܘܖ̈ܶܝܗ̇ ܕܽܐܘܪܺܫܠܶܡ ܕܡܶܬܬܰܪܥܺܝܢ ܗ̱ܘܰܘ. ܘܬܰܖ̈ܥܶܐ ܝܰܩܺܝܕܺܝܢ ܗ̱ܘܰܘ ܒܢܽܘܪܳܐ.
14 ܘܥܶܒܕܶܬ ܥܰܠ ܬܰܪܥܳܐ ܕܢܰܚܠܳܐ ܘܠܰܐܓܡܳܐ ܕܡܰܠܟܳܐ. ܘܠܰܝܬ ܗ̱ܘܳܐ ܐܰܬܪܳܐ ܠܰܒܥܺܝܪܳܐ: ܠܡܶܥܒܰܪ ܬܰܡܳܢ.
15 ܘܰܗܘܺܝ݀ܬ ܣܳܠܶܩ ܒܢܰܚܠܳܐ ܒܠܺܠܝܳܐ. ܘܰܗܘܺܝ݀ܬ ܣܳܟܰܪ ܒܠܺܠܝܳܐ ܘܳܐܬܶܐ ܘܥܶܠܶ݀ܬ ܒܰܬܪܰܥ ܢܰܚܠܳܐ ܘܗܶܦܟܶ݀ܬ.
16 ܫܰܠܺܝܛܳܢ̈ܶܐ ܠܳܐ ܝܺܕܰܥܘ ܠܰܐܝܟܳܐ ܐܶܙܶܠ̱ܬ: ܘܡܳܢܳܐ ܥܳܒܶܕ ܐ̱ܢܳܐ. ܘܰܠܝܽܗܘ̈ܕܳܝܶܐ: ܘܰܠܟܳܗ̈ܢܶܐ: ܘܰܠܫܰܠܺܝܛܳܢ̈ܶܐ: ܘܰܠܣܳܦܳܖ̈ܶܐ: ܘܰܠܫܰܪܟܳܐ ܕܥܳܒܕܰܝ̈: ܥܒܺܝܕܬܳܐ: ܥܕܰܡܳܐ ܠܶܗܫܳܐ ܠܳܐ ܚܰܘܺܝܬ.
17 ܘܶܐܡܪܶܬ ܠܗܽܘܢ: ܐܰܢ̱ܬܽܘܢ ܚܳܙܶܝܢ ܒܺܝܫܬܳܐ ܕܰܚܢܰܢ ܒܳܗ̇. ܕܗܳܐ ܐܽܘܪܺܫܠܶܡ ܚܰܪܒܳܐ. ܘܬܰܖ̈ܥܶܝܗ̇ ܝܰܩܺܝܕܺܝܢ ܒܢܽܘܪܳܐ. ܬܰܘ ܢܶܒܢܶܐ ܫܽܘܪܳܐ ܕܽܐܘܪܺܫܠܶܡ. ܘܠܳܐ ܢܶܗܘܶܐ ܡܶܟܺܝܠ ܚܶܣܕܳܐ.
18 ܘܰܓܠܺܝ݀ܬ ܠܗܽܘܢ ܐܺܝܕܳܐ ܕܰܐܠܳܗܳܐ ܕܰܗܘܳܬ ܥܰܡܝ ܠܛܳܒ: ܘܳܐܦ ܡܶܠܰܝ̈ ܡܰܠܟܳܐ ܕܶܐܬܐ̱ܡܰܪ ܠܺܝ: ܘܳܐܡܪܺܝܢ: ܩܳܝܡܺܝܢ ܚܢܰܢ: ܘܒܳܢܶܝܢ ܚܢܰܢ. ܘܰܐܥܫܶܢܘ ܐܺܝܕܰܝ̈ܗܽܘܢ ܠܡܶܥܒܰܕ ܕܛܳܒ.
19 ܘܰܫܡܰܥ ܣܰܡܒܠܳܛ ܚܽܘܪܳܢܳܝܳܐ: ܘܛܽܘܒܝܳܐ: ܓܰܒܖ̈ܶܐ ܥܰܡܽܘܢܳܝ̈ܶܐ: ܘܰܓܫܽܘܡ ܥܰܪܒܳܝܳܐ. ܘܰܓܚܶܟܘ ܥܠܰܝܢ ܘܡܰܝܶܩܘ ܒܰܢ. ܘܳܐܡܪܺܝܢ: ܡܳܢܳܐ ܗ̱ܝ ܡܶܠܬܳܐ ܗܳܕܶܐ ܕܥܳܒܕܺܝܢ ܐܢ̱ܬܽܘܢ. ܕܰܠܡܳܐ ܥܰܠ ܡܰܠܟܳܐ ܡܳܪܕܺܝܢ ܐܢ̱ܬܽܘܢ.
20 ܘܰܐܬܺܝܒܶܬ ܐܶܢܽܘܢ ܦܶܬܓܳܡܳܐ: ܘܶܐܡܪܶܬ ܠܗܽܘܢ: ܐܰܠܳܗܰܐ ܗ̱ܘ ܕܰܫܡܰܝܳܐ ܦܰܪܩܰܢ. ܘܰܚܢܰܢ ܥܳܒܕܺܝܢ ܘܩܳܝܡܺܝܢ ܘܒܳܢܶܝܢ. ܘܰܠܟܽܘܢ ܠܰܝܬ ܠܟܽܘܢ ܙܶܕܩܳܐ ܘܕܽܘܟܪܳܢܳܐ ܘܰܡܢܳܬܳܐ ܒܽܐܘܪܺܫܠܶܡ.