1 Maccabees 7
The First Book of Maccabees
܀ ܐ ܡܩܒܝ̈ܐ ܙ ܀
1 ܒܰܫܢܰܬ ܡܳܐܐ ܘܚܰܡܫܺܝܢ ܘܰܚܕܳܐ. ܢܦܰܩ ܕܺܡܰܛܪܺܝܳܘܣ ܒܰܪ ܣܶܠܶܘܩܽܘܣ ܡܶܢ ܪܽܘܡܺܝ. ܘܰܣܠܶܩ ܒܐ̱ܢܳܫ̈ܳܐ ܙܥܽܘܖ̈ܶܐ ܥܰܠ ܡܕܺܝ̈ܢܳܬܳܐ ܕܥܰܠ ܣܦܳܖ̈ܰܝ ܝܰܡܳܐ. ܘܰܐܡܠܶܟ ܬܰܡܳܢ.
2 ܘܰܗܘܳܐ ܟܰܕ ܥܳܐܶܠ ܗܘܳܐ ܠܒܶܝܬ ܡܰܠܟܽܘܬܳܐ ܕܰܐܒܳܗܰܘ̈ܗܝ: ܐܶܚܰܕܘ ܚܰܝ̈ܠܶܐ ܠܰܐܢܛܺܝܰܟܳܘܣ ܘܰܠܠܽܘܣܺܝܳܐ ܕܢܰܣܩܽܘܢ ܐܶܢܽܘܢ ܠܘܳܬܶܗ.
3 ܘܶܐܬܝܰܕܥܰܬ ܠܶܗ ܨܒܽܘܬܳܐ. ܘܶܐܡܰܪ ܠܳܐ ܬܚܰܘܽܢܳܢܝ ܐܰܦܰܝ̈ܗܽܘܢ.
4 ܘܩܰܛܶܠܘ ܐܶܢܽܘܢ ܚܰܝ̈ܠܶܐ. ܘܺܝܬܶܒ ܕܺܝܡܶܛܪܺܝܳܘܣ ܥܰܠ ܟܽܘܪܣܝܳܐ ܕܡܰܠܟܽܘܬܶܗ.
5 ܘܶܐܬܰܘ ܠܘܳܬܶܗ ܟܽܠܗܽܘܢ ܓܰܒܖ̈ܶܐ ܥܰܘ̈ܳܠܶܐ ܘܖ̈ܰܫܺܝܥܶܐ ܡܶܢ ܝܺܣܪܳܐܶܝܠ. ܘܶܐܠܩܺܝܡܳܘܣ ܗܘܳܐ ܗܘܳܐ ܡܕܰܒܪܳܢܗܽܘܢ. ܕܨܳܒܶܐ ܗܘܳܐ ܕܢܶܗܘܶܐ ܪܰܒ ܟܳܗ̈ܢܶܐ.
6 ܘܶܐܟܰܠ ܩܰܪ̈ܨܰܘܗܝ ܕܥܰܡܳܐ ܩܕܳܡ ܡܰܠܟܳܐ. ܘܶܐܡܰܪ ܐܰܘܒܶܕ ܝܺܗܽܘܕܳܐ ܘܰܐܚܰܘ̈ܗܝ ܠܪ̈ܳܚܡܰܝܟ. ܘܠܰܢ ܒܰܕܪܽܘܢ ܡܶܢ ܐܰܪܥܳܐ.
7 ܘܗܳܫܳܐ ܫܰܕܰܪ ܓܰܒܪܳܐ ܐܰܝܢܳܐ ܕܰܡܗܰܝܡܰܢ ܠܳܟ: ܘܢܺܐܙܰܠ ܘܢܶܚܙܶܐ ܟܽܠܶܗ ܐܰܒܕܳܢܳܐ ܕܰܥܒܰܕ ܒܰܢ ܘܒܰܐܪܥܶܗ ܕܡܰܠܟܳܐ. ܕܰܐܝܟܰܢܳܐ ܫܰܢܶܩ ܐܶܢܽܘܢ ܘܰܠܟܽܠܗܽܘܢ ܡܥܰܕܪ̈ܳܢܰܝܗܽܘܢ.
8 ܘܰܓܒܳܐ ܡܰܠܟܳܐ ܠܒܺܝܟܪܺܝܳܘܣ ܪܳܚܡܶܗ. ܕܰܡܫܰܠܰܛ ܗܘܳܐ ܒܗܰܘ ܥܶܒܪܶܗ ܕܰܢܗܪܳܐ. ܘܪܰܒܳܐ ܗܘܳܐ ܘܰܡܗܰܝܡܢܳܐ ܒܡܰܠܟܽܘܬܶܗ.
9 ܘܫܰܕܪܶܗ ܠܶܗ ܘܠܶܐܠܩܺܝܡܳܘܣ ܪܰܫܺܝܥܳܐ. ܘܰܐܩܺܝܡ ܠܶܗ ܟܳܗܢܽܘܬܳܐ. ܘܦܰܩܕܶܗ ܕܢܶܥܒܶܕ ܦܽܘܪܥܳܢܳܐ ܒܰܒܢܰܝ̈ ܝܺܣܪܳܐܶܝܠ.
10 ܘܰܫܩܰܠܘ ܘܶܐܬܰܘ ܠܰܐܪܥܳܐ ܕܺܝܗܽܘܕܳܐ ܒܚܰܝܠܳܐ ܣܰܓܺܝܐܳܐ. ܘܫܰܕܰܪܘ ܡܰܠܰܐܟ̈ܶܐ ܠܘܳܬ ܝܺܗܽܘܕܳܐ ܘܰܐܚܰܘ̈ܗܝ: ܒܡ̈ܶܠܶܐ ܕܰܫܠܰܡܳܐ ܒܢܶܟܠܳܐ.
11 ܘܚܳܪܘ ܘܶܐܣܬܰܟܰܠܘ ܒܡܶܠܰܝ̈ܗܽܘܢ. ܚܙܰܘ ܓܶܝܪ ܕܶܐܬܰܘ ܠܘܳܬܗܽܘܢ ܒܚܰܝܠܳܐ ܪܰܒܳܐ.
12 ܘܶܐܬܟܰܢܰܫܘ ܠܘܳܬ ܐܶܠܩܺܝܡܳܘܣ ܘܒܺܝܟܪܺܝܳܘܣ ܟܢܽܘܫܬܳܐ ܕܣܳܦܖ̈ܶܐ ܠܡܶܦܩܰܕ ܘܰܠܡܳܒܥܳܐ ܟܺܐܢܽܘܬܳܐ.
13 ܘܩܰܕܡܳܝ̈ܶܐ ܐܺܝܬܰܝܗܽܘܢ ܗܘܰܘ ܡܫܰܒܚܳܢ̈ܶܐ ܒܰܒܢܰܝ̈ ܝܺܣܪܳܐܶܝܠ: ܘܒܳܥܶܝܢ ܗܘܰܘ ܡܶܢܗܽܘܢ ܫܠܳܡܳܐ.
14 ܐܶܡܰܪܘ ܓܶܝܪ ܕܓܰܒܪܳܐ ܟܳܗܢܳܐ ܐܶܬܳܐ ܡܶܢ ܙܰܪܥܶܗ ܕܰܐܗܪܽܘܢ ܥܰܡ ܚܰܝܠܳܐ. ܘܠܳܐ ܡܰܒܐܶܫܺܝܢ ܠܰܢ.
15 ܘܡܰܠܶܠ ܥܰܡܗܽܘܢ ܡ̈ܶܠܶܐ ܕܰܫܠܳܡܳܐ. ܘܺܝܡܳܐ ܠܗܽܘܢ ܘܶܐܡܰܪ. ܕܠܳܐ ܢܶܒܥܶܐ ܘܠܳܐ ܢܶܬܚܰܫܰܒ ܒܺܝܫܬܳܐ ܘܰܠܪ̈ܳܚܡܰܝܟܽܘܢ.
16 ܘܗܰܝܡܢܽܘܗܝ ܘܶܐܚܰܕ ܡܶܢܗܽܘܢ ܫܬܺܝܢ ܓܰܒܪ̈ܺܝܢ: ܘܩܰܛܶܠ ܐܶܢܽܘܢ ܒܚܰܕ ܝܰܘܡܳܐ ܐܰܝܟ ܡܶܠܬܳܐ ܕܶܐܡܰܪ ܢܒܺܝܳܐ.
17 ܕܒܶܣܪܳܐ ܕܚܰܣܝܰܝ̈ܟ ܘܕܶܡܗܽܘܢ ܐܶܫܰܕܘ ܚܕܳܖ̈ܰܝܗ̇ ܕܽܐܘܪܺܫܠܶܡ ܘܠܳܐ ܐܺܝܬ ܠܗܽܘܢ ܕܩܳܒܰܪ.
18 ܘܢܶܦܠܰܬ ܕܶܚܠܬܗܽܘܢ ܥܰܠ ܟܽܠܶܗ ܥܰܡܳܐ. ܐܶܡܰܪܘ ܓܶܝܪ ܕܠܰܝܬ ܠܗܽܘܢ ܫܪܳܪܳܐ ܘܰܐܦܠܳܐ ܕܺܝܢܳܐ. ܥܒܰܪܘ ܓܶܝܪ ܥܰܠ ܕܺܝܢܳܐ ܘܡܰܘ̈ܡܳܬܳܐ ܘܰܩܝܳܡܳܐ ܕܰܐܩܺܝܡܘ.
19 ܘܰܫܩܰܠ ܒܺܝܟܪܺܝܳܘܣ ܡܶܢ ܐܽܘܪܺܫܠܶܡ. ܘܰܫܪܳܐ ܥܰܠ ܒܶܝܬ ܙܳܪܳܐ. ܘܫܰܕܰܪ ܘܶܐܚܰܕ ܡܶܢ ܐ̱ܢܳܫ̈ܳܐ ܕܰܡܪܰܕܘ ܥܠܰܘܗܝ ܘܳܐܦ ܡܶܢ ܥܰܡܳܐ. ܘܢܰܟܶܣ ܐܶܢܽܘܢ ܥܰܠ ܒܺܪܳܐ ܪܰܒܬܳܐ.
20 ܘܰܐܫܠܶܡ ܐܰܪܥܳܐ ܠܶܐܠܩܺܝܡܳܘܣ ܘܰܫܒܰܩ ܠܘܳܬܶܗ ܚܰܝܠܳܐ ܠܥܽܘܕܪܳܢܶܗ. ܘܶܐܬܳܐ ܒܺܝܟܪܺܝܳܘܣ ܠܘܳܬ ܡܰܠܟܳܐ.
21 ܐܶܠܩܺܝܡܳܘܣ ܕܶܝܢ ܡܶܬܟܰܬܰܫ ܗܘܳܐ ܥܰܠ ܪܰܒܽܘܬ ܟܳܗܢܽܘܬܳܐ.
22 ܘܶܐܬܟܰܢܰܫܘ ܠܘܳܬܶܗ ܟܽܠܗܽܘܢ ܐܰܝܠܶܝܢ ܕܫܳܓܫܺܝܢ ܗܘܰܘ ܠܥܰܡܗܽܘܢ. ܘܰܐܚܕܽܘܗ̇ ܠܰܐܪܥܳܐ ܕܺܝܗܽܘܕܳܐ. ܘܰܥܒܰܕܘ ܡܚܽܘܬܳܐ ܪܰܒܬܳܐ ܒܺܝܣܪܳܐܶܝܠ.
24 ܘܰܚܙܳܐ ܝܺܗܽܘܕܳܐ ܠܟܽܠܳܗ̇ ܒܺܝܫܬܳܐ ܕܰܥܒܰܕ ܐܶܠܩܺܝܡܳܘܣ ܘܰܐܝܠܶܝܢ ܕܥܰܡܶܗ ܒܰܒܢܰܝ̈ ܝܺܣܪܳܐܶܝܠ ܝܰܬܺܝܪ ܡܶܢ ܥܰܡ̈ܡܶܐ.
24 ܘܰܢܦܰܩ ܠܟܽܠܗܽܘܢ ܬܚܽܘ̈ܡܶܝܗ̇ ܕܺܝܗܽܘܕ ܟܰܕ ܚܳܕܪܳܝܢ. ܘܰܥܒܰܕ ܕܺܝܢܳܐ ܒܓܰܒܖ̈ܶܐ ܐܰܝܠܶܝܢ ܕܰܡܪܰܕܘ ܘܶܐܫܬܰܕܰܪܘ ܕܰܢܗܰܠܟܽܘܢ ܒܰܐܪܥܳܐ.
25 ܘܟܰܕ ܕܶܝܢ ܚܙܳܐ ܐܶܠܩܺܝܡܳܘܣ ܕܶܐܬܥܰܫܰܢ ܝܺܗܽܘܕܳܐ ܘܰܐܝܠܶܝܢ ܕܥܰܡܶܗ: ܘܺܝܕܰܥ ܕܠܳܐ ܡܶܫܟܰܚ ܠܰܡܩܳܡ ܩܕܳܡܰܝܗܽܘܢ: ܗܦܰܟ ܠܘܳܬ ܡܰܠܟܳܐ. ܘܶܐܟܰܠ ܩܰܪ̈ܨܰܝܗܽܘܢ ܒܒܺܝ̈ܫܳܬܳܐ ܣܰܓܺܝ̈ܐܳܬܳܐ.
26 ܘܫܰܕܰܪ ܡܰܠܟܳܐ ܕܺܡܰܛܪܺܝܳܘܣ ܠܢܺܝܩܳܢܳܘܪ ܚܰܕ ܡܶܢ ܡܫܰܒ̈ܚܶܐ ܕܪܰܘܪ̈ܒܳܢܰܘܗܝ. ܕܰܒܣܶܢܶܐܬܳܐ ܘܰܒܥܶܠܕܒܳܒܽܘܬܳܐ ܐܺܝܬܰܘܗܝ ܗܘܳܐ ܠܘܳܬ ܝܺܣܪܳܐܶܝܠ. ܘܦܰܩܕܶܗ ܕܢܰܛܥܺܝܘܗܝ ܘܰܢܪܺܝܡܺܝܘܗܝ ܠܥܰܡܳܐ.
27 ܘܶܐܬܳܐ ܢܺܝܩܳܢܳܘܪ ܠܽܐܘܪܺܫܠܶܡ ܒܚܰܝܠܳܐ ܣܰܓܺܝܐܳܐ ܘܫܰܕܰܪ ܠܘܳܬ ܝܺܗܽܘܕܳܐ ܘܰܐܚܰܘ̈ܗܝ ܡ̈ܶܠܶܐ ܕܰܫܠܳܡܳܐ ܒܢܶܟܠܳܐ ܘܶܐܡܰܪ ܠܗܽܘܢ.
28 ܠܳܐ ܬܶܗܘܶܐ ܡܰܨܽܘܬܳܐ ܒܰܝ̈ܢܰܝ ܘܰܠܟܽܘܢ. ܘܶܐܬܺܝܬ ܒܓܰܒܖ̈ܶܐ ܙܥܽܘܖ̈ܶܐ ܕܶܐܚܙܶܐ ܐܰܦܰܝ̈ܟܽܘܢ ܒܰܫܠܳܡܳܐ.
29 ܘܶܐܬܰܘ ܠܘܳܬ ܝܺܗܽܘܕܳܐ ܘܰܫܐܶܠܘ ܒܰܫܠܳܡܳܐ ܚܰܕ ܕܚܰܕ. ܚܰܝ̈ܠܶܐ ܕܶܝܢ ܡܥܰܬܕܺܝܢ ܗܘܰܘ ܕܢܶܚܛܦܽܘܢܳܝܗܝ ܠܺܝܗܽܘܕܳܐ.
30 ܘܶܐܬܝܰܕܥܰܬ ܡܶܠܬܳܐ ܠܺܝܗܺܘܕܳܐ ܕܰܒܢܶܟܠܳܐ ܐܶܬܰܘ ܨܶܐܕܰܘܗܝ. ܘܰܐܪܚܶܩ ܠܶܗ ܡܶܢܶܗ. ܘܬܽܘܒ ܠܳܐ ܨܳܒܶܐ ܗܘܳܐ ܕܢܶܚܙܶܐ ܐܰܦܰܘ̈ܗܝ.
31 ܘܺܝܕܰܥ ܢܺܝܩܳܢܳܘܪ ܕܶܐܬܓܰܠܝܰܬ ܠܳܗ̇ ܡܰܚܫܰܒܬܶܗ. ܘܰܢܦܰܩ ܠܽܐܘܪܥܶܗ ܕܺܝܗܽܘܕܳܐ ܠܽܘܩܒܰܠ ܟܦܰܪ ܫܠܳܡܳܐ.
32 ܘܰܢܦܰܠܘ ܡܶܢ ܓܰܒܖ̈ܶܐ ܕܥܰܡ ܢܺܝܩܳܢܳܘܪ ܐܰܝܟ ܚܰܡܶܫܡܳܐܐ: ܘܰܥܪܰܩܘ ܠܰܡܕܺܝܢܬܶܗ ܕܕܰܘܺܝܕ.
33 ܘܡܶܢ ܒܳܬܰܪ ܡ̈ܶܠܶܐ ܗܳܠܳܝܢ: ܣܠܶܩ ܢܺܝܩܳܢܳܘܪ ܠܛܽܘܪܳܐ ܕܨܶܗܝܽܘܢ. ܘܰܢܦܰܩܘ ܟܳܗ̈ܢܶܐ ܡܶܢ ܒܶܝܬ ܡܰܩܕܫܳܐ: ܘܡܶܢ ܩܫܺܝ̈ܫܶܐ ܕܥܰܡܳܐ ܕܰܢܫܰܐܠܽܘܢ ܒܰܫܠܳܡܶܗ: ܘܕܰܢܚܰܘܽܘܢܳܝܗܝ ܝܰܩܕ̈ܶܐ ܘܩܽܘܪ̈ܒܳܢܶܐ ܕܡܶܬܩܰܪܒܺܝܢ ܥܰܠ ܐܰܦܰܝ̈ ܡܰܠܟܳܐ.
34 ܘܡܰܝܶܩ ܘܒܰܙܰܚ ܒܗܽܘܢ ܘܫܳܛ ܐܶܢܽܘܢ. ܘܡܰܠܶܠ ܒܫܰܒܗܪܳܢܽܘܬܳܐ.
35 ܘܺܝܡܳܐ ܒܚܶܡܬܳܐ ܘܶܐܡܰܪ. ܕܶܐܢ ܠܳܐ ܢܶܫܬܠܶܡ ܗܳܫܳܐ ܝܺܗܽܘܕܳܐ ܘܡܰܫܪܺܝܬܶܗ ܒܺܐܝܕܰܝ̈: ܡܳܐ ܕܗܶܦܟܶܬ ܒܰܫܠܳܡܳܐ: ܐܰܘܩܕܺܝܘܗܝ ܠܗܳܢܳܐ ܒܰܝܬܳܐ. ܘܰܢܦܰܩ ܒܶܚܡܬܳܐ ܪܰܒܬܳܐ.
36 ܘܥܰܠܘ ܟܳܗ̈ܢܶܐ ܘܩܳܡܘ ܩܕܳܡ ܡܕܰܒܚܳܐ ܘܩܶܣܛܪܽܘܡܳܐ. ܘܰܒܟܰܘ ܘܶܐܡܰܪܘ.
37 ܐܰܢ̱ܬ ܡܳܪܝܳܐ ܓܒܰܝܬ ܠܳܟ ܗܳܢܳܐ ܒܰܝܬܳܐ ܕܢܶܬܩܪܶܐ ܫܡܳܟ ܥܠܰܘܗܝ: ܘܰܕܢܶܗܘܶܐ ܒܶܝܬ ܨܠܽܘܬܳܐ ܘܒܳܥܽܘܬܳܐ ܠܥܰܡܳܟ.
38 ܥܒܶܕ ܦܽܘܪܥܳܢܳܐ ܡܶܢ ܓܰܒܪܳܐ ܗܳܢܳܐ ܘܡܶܢ ܡܰܫܪܺܝܬܶܗ. ܘܢܶܦܠܽܘܢ ܒܪܽܘܡܚܳܐ. ܘܶܐܬܕܰܟܪ ܓܽܘܕܳܦܗܽܘܢ. ܘܠܳܐ ܬܶܬܶܠ ܒܗܽܘܢ ܚܰܝܠܳܐ ܘܰܡܣܰܝܒܪܳܢܽܘܬܳܐ.
39 ܘܰܢܦܰܩ ܢܺܝܩܳܢܳܘܪ ܡܶܢ ܐܽܘܪܺܫܠܶܡ: ܘܰܫܪܳܐ ܥܰܠ ܒܶܝܬ ܚܰܘܪܳܢ ܘܰܐܪܥܶܗ ܚܰܝܠܳܐ ܕܣܽܘܪܺܝܰܐ.
40 ܘܺܝܗܽܘܕܳܐ ܫܪܳܐ ܥܰܠ ܐܰܪܣܳܐ ܒܰܬܠܳܬܳܐ ܐܰܠܦܺܝ̈ܢ ܓܰܒܪ̈ܺܝܢ. ܘܨܰܠܺܝ ܝܗܽܘܕܳܐ ܘܶܐܡܰܪ.
41 ܡܳܪܝܳܐ: ܐܰܢ̱ܬ ܗܽܘ ܗܰܘ ܕܟܰܕ ܓܰܕܶܦܘ ܥܠܰܝܟ ܚܰܝ̈ܠܶܐ ܕܡܰܠܟܳܐ ܕܳܐܬܽܘܪ: ܢܦܰܩ ܡܰܠܰܐܟܳܟ ܘܰܚܪܰܒ ܐܶܢܽܘܢ ܠܡܳܐܐ ܘܰܬܡܳܢܺܐܝܢ ܘܚܰܡܫܳܐ ܐܰܠܦܺܝ̈ܢ.
42 ܗܳܟܰܢܳܐ ܫܚܽܘܩ ܘܬܰܒܰܪ ܡܰܫܪܺܝܬܳܐ ܗܳܕܶܐ ܝܰܘܡܳܢܳܐ ܩܕܳܡܰܝܢ. ܘܢܶܕܥܽܘܢ ܫܰܪܟܳܐ ܕܰܐ̱ܚܪ̈ܳܢܶܐ ܕܒܺܝܫܳܐܺܝܬ ܡܰܠܶܠ ܥܰܠ ܒܶܝܬ ܡܰܩܕܫܳܟ. ܘܕܽܘܢ ܐܶܢܽܘܢ ܐܰܝܟ ܒܺܝܫܽܘܬܗܽܘܢ.
43 ܫܪܺܝ ܡܰܫܪ̈ܝܳܬܳܐ ܕܢܰܩܪ̈ܒܳܢ ܒܰܬܠܳܬܥܶܣܪܳܐ ܒܰܐܕܳܪ ܝܰܪܚܳܐ. ܘܶܐܬܬܰܒܪܰܬ ܡܰܫܪܺܝܬܶܗ ܕܢܺܝܩܳܢܳܘܪ. ܘܰܢܦܰܠ ܗܽܘ ܒܩܰܕܡܐ ܒܰܩܪܳܒܳܐ.
44 ܟܰܕ ܕܶܝܢ ܚܙܳܬ ܡܰܫܪܺܝܬܶܗ ܕܢܺܝܩܳܢܳܘܪ ܕܰܢܦܰܠ ܠܶܗ: ܫܕܰܘ ܙܰܝܢܗܽܘܢ ܘܰܥܪܰܩܘ.
45 ܘܪܳܕܦܺܝܢ ܗܘܰܘ ܠܗܽܘܢ ܕܒܶܝܬ ܝܺܗܽܘܕܳܐ ܡܰܪܕܳܐ ܝܰܘܡܳܐ ܚܰܕ. ܡܶܢ ܐܰܪܣܳܐ ܘܰܥܕܰܡܳܐ ܕܶܐܬܰܘ ܠܰܓܙܺܝܪܳܐ. ܘܰܩܪܰܘ ܒܳܬܰܪܗܽܘܢ ܒܩܰܪ̈ܢܳܬܳܐ ܝܺܕܺܝ̈ܥܳܬܳܐ.
46 ܘܰܢܦܰܩܘ ܡܶܢ ܟܽܠܗܶܝܢ ܩܽܘܪ̈ܝܳܐ ܕܺܝܗܽܘܕܳܐ. ܘܰܡܚܰܡܠܺܝܢ ܗܘܰܘ ܘܰܡܗܦܟܺܝܢ ܠܗܽܘܢ ܚܰܕ ܠܘܳܬ ܚܰܕ. ܥܕܰܡܳܐ ܕܰܢܦܰܠܘ ܟܽܠܗܽܘܢ ܒܦܽܘܡܳܐ ܕܚܰܪܒܳܐ: ܥܕܰܡܳܐ ܕܠܳܐ ܐܶܫܬܚܰܪ ܡܶܢܗܽܘܢ ܐܳܦܠܳܐ ܚܰܕ.
47 ܘܰܢܣܰܒܘ ܒܶܙܬܗܽܘܢ ܘܰܫܒܺܝܬܗܽܘܢ. ܘܰܫܩܰܠܘ ܪܺܝܫܶܗ ܕܢܺܝܩܳܢܳܘܪ: ܘܝܰܡܺܝܢܶܗ ܗܳܝ ܕܰܐܪܺܝܡ ܗܘܳܐ ܒܫܽܘܒܗܳܪܳܐ. ܘܰܐܝܬܺܝܘ ܘܰܬܠܰܘ ܐܶܢܽܘܢ ܒܽܐܘܪܺܫܠܶܡ.
48 ܘܶܐܬܒܰܣܰܡ ܥܰܡܳܐ ܣܰܓܺܝ ܘܰܐܩܺܝܡܽܘܗܝ ܠܝܰܘܡܳܐ ܗܳܢܳܐ ܒܒܽܘܣܳܡܳܐ ܘܰܒܚܰܕܽܘܬܳܐ.
49 ܘܣܳܡܘ ܕܗܽܘ ܥܳܒܕܺܝܢ ܠܶܗ ܫܢܳܐ ܠܰܫܢܳܐ ܒܰܬܠܳܬܥܶܣܪܳܐ ܒܳܐܕܳܪ. ܘܫܶܠܝܰܬ ܐܰܪܥܳܐ ܕܺܝܗܽܘܕܳܐ ܝܰܘ̈ܡܳܬܳܐ ܙܥܽܘܖ̈ܶܐ.